खोज

चन्द्रौटा(कपिलवस्तु), २८ चैत ।

नयाँ शैक्षिक सत्रको शुरुवातसँगै यतिबेला सामुदायिक तथा निजी विद्यालयहरुलाई नतिजा प्रकाशनको चटारो छ ।

भर्ना अभियान संचालन गरी विद्यार्थी संख्यामा वृद्धि गर्न विद्यालयहरुलाई वार्षिक नतिजा प्रकाशनमा चटारो भएको हो । चैतको दोस्रो साताभित्रै वार्षिक परीक्षा सम्पन्न गरेका कपिलवस्तुका सामुदायिक तथा निजी विद्यालयहरु भर्ना अभियान संचालन गर्न नतिजा प्रकाशनमा जुटेका छन् । कतिपय विद्यालयले चैतको तेस्रो सातामै नतिजा प्रकाशित गरिसकेका छन् भने अधिकांश विद्यालयले चैतको अन्तिम साताभित्रै परीक्षाफल प्रकाशनको तयारीमा जुटेका छन् ।

“समयमै भर्ना, समयमै ज्ञान, गुणस्तरीय शिक्षा सबैको अभियान” शैक्षिक सत्र २०८० को भर्ना अभियानको मूल नारासहित नयाँ भर्ना शुरु भएको छ । भर्ना कार्यक्रमसँगै विद्यालयलाई यतिबेला नतिजा प्रकाशनमा भ्याईनभ्याई भएको हो ।

यसैबीच जिल्लाको शिवराज नगरपालिका १, शिवपुरस्थित श्री सरस्वती आधारभूत विद्यालयले ३२ औं वार्षिकोत्सव, १८ औं अभिभावक दिवस मनाएको छ । विद्यालयले अभिभावक दिवससँगै वार्षिक नतिजा प्रकाशन र उत्कृष्ट विद्यार्थीहरुलाई पुरस्कार वितरण गरेको छ ।

कार्यक्रमलाई उदघाटन गर्दै शिवराज नगरपालिका वडा नं.. १ का वडाध्यक्ष खिमविक्रम केसीले विद्यालयको शैक्षिक स्तर देखिने गरी सुधार हुनुपर्नेमा जोड दिए । “सूचना र प्रविधिको विकाससँगै अब शिक्षामा गुणस्तर सुधार ल्याउन आवश्यक छ” – वडाध्यक्ष के.सी.ले भने । निजी विद्यालयसँग प्रतिष्पर्धा गर्न अब सामुदायिक विद्यालय अंग्रेजी माध्यममा पठनपाठन गरी शैक्षिक सुधारमा जुट्नुपर्ने उनले तर्क राखे ।

कार्यक्रममा पूर्व वडाध्यक्ष एवं विद्यालयका पूर्व अध्यक्ष जगतबहादुर जि.सी.ले अबको आवश्यकता व्यावसायिक र प्राविधिक शिक्षा रहेकोमा जोड दिए । नगरपालिकाले गुणस्तरीय निःशुल्क शिक्षाको नाममा नमूनामा परेका विद्यालयलाई समेत मर्ज गर्दा विश्वास घटेको औल्याए । उनले विद्यालय मर्जर र शिक्षक सरुवाले शिक्षामा सुधार नआउने समेत बताए ।

यसैगरी कार्यक्रममा एकीकृत सुरही सामुदायिक वन उपभोक्ता समूहका अध्यक्ष फानेश्वर न्यौपाने, समाजसेवी एवं शिक्षाप्रेमी बाबुराम खनाल, देविस्थान आधारभूत विद्यालयका प्रधानाध्यापक विश्वराम थारु, भूपू सैनिक संगठनका अध्यक्ष झग बहादुर पुन, विद्यालयका पूर्व सदस्य ऋषिराम खनाल, शिक्षक अभिभावक संघका पूर्व अध्यक्ष कृष्णकला भारती, अभिभावक दीपक खनाल लगायतले विद्यालयको अग्रगामी विकासका लागि अभिभावकहरु जागरुक हुनुपर्ने बताउँदै विद्यालयको उत्तरोत्तर प्रगतिको शुभकामना दिएका थिए ।

कार्यक्रममा विद्यालयका प्रधानाध्यापक सीताराम चौधरीले वार्षिक प्रगति तथा आगामी योजना बारे तयार पारिएको प्रतिवेदन प्रस्तुत गरेका थिए । कार्यक्रममा विद्यालयका अध्यक्ष छन्द बहादुर सिंह जि.सी.ले यस विद्यालयलाई नमूना बनाउन सबै अभिभावक अभियानमा जुट्नुपर्नेमा जोड दिए । उनले भर्ना अभियान सफल पार्न सबै अभिभावक, शिक्षक सक्रिय हुनुपर्ने तर्क राखे ।

कार्यक्रमको अवसरमा विद्यालयमा सर्बोत्कृष्ट हुने प्रावि तहका ३ र निमावि तहका ३ गरी ६ जना विद्यार्थीलाई पुरस्कारको व्यवस्था समाजसेवी एवं शिक्षाप्रेमी बाबुराम खनालले सौजन्य गरेका थिए । यस्तै विद्यालयमा अध्ययनरत गरीब तथा विपन्न १५ बालबालिकाहरुलाई छात्रवृत्तिका लागि अक्षयकोषदाता डालबहादुर वि.क., सुमनदेवी अधिकारी र कृष्ण प्रसाद खनालले गरेका अक्षयकोषको व्याजबाट १५ जना विद्यार्थीलाई विद्यालय पोशाक वितरण गरिएको थियो । साथै कक्षामा उत्कृष्ट तथा विभिन्न विधामा उत्कृष्ट बालबालिकाहरुलाई पुरस्कारद्वारा सम्मान गरिएको थियो ।