खोज

पूर्व प्रधानमन्त्री तथा नेपाली कांग्रेसका सभापति शेर बहादुर देउवाले मिडियामाथिको हस्तक्षेप बन्द गर्नुपर्ने बताएका छन् । बुद्ध टेलिभिजनको एघारौं वार्षिकोत्सव समारोहलाई सम्बोधन गर्दै देउवाले रूपन्देहीका प्रमुख जिल्ला अधिकारीलाई मिडियामाथि हस्तक्षेप नगर्न चेतावनी दिँदै उनले भने–‘यहाँ मिडियालाई कुनै पनि अवरोध सीडीओबाट भए हामीले काठमाडौमा आन्दोलन गर्नेछौं ।’ मनपरी गर्ने सिडिओलाई आफूले ठेगान समेत लगाउने बताए । देउवाले टेलिभिजनको ११ औं साधारण सभा तथा अधिवशेन रोक्नको लागि रूपन्देही सिडिओ उदय बहादुर रानाको निर्देशनमा सहायक प्रमुख जिल्ला अधिकारी नारायण पाण्डेयले शुक्रबार पत्र पठाएका थिए ।
सेयर सदस्य श्यामकली आचार्य लगायतले टेलिभिजनको साधारण सभा र अधिवेशन रोक्न माग गरेको भन्दै प्रशासनले साधारणसभा रोक्न सो पत्र पठाएको थियो । सो जानकारी पाएसँगै देउवा प्रजिअमाथि आक्रोसित भएका हुन् । करिब तीन मिनेटको सम्बोधनका क्रममा अधिकांश समय सीडीओमाथि खनिएका देउवाले पाँच नम्बर प्रदेशमा रहेका संचारमाध्यमले बुद्ध दर्शन र बुद्ध शिक्षालाई प्रचार गर्नुपर्नेमा पनि जोड दिए । यस्तै कांग्रेसका प्रमुख सचेतक बालकृष्ण खाँणले प्रदेश ५ को राजधानी बुटवलबाट अन्यत्र कसैले सार्न नसक्ने बताए । प्रदेश ५ का मुख्यमन्त्री शंकर पोखरेल, नेकपाका नेता एवं संघीय संसदका सभामुख कृष्णबहादुर महराले प्रदेशको राजधानी बुटवलबाट अन्तै सार्छौं भन्ने अभिव्यक्ति बेलाबेलामा दिइरहेको उल्लेख गर्दै त्यो प्रयास सफल नहुने स्पष्ट पारे । कार्यक्रममा प्रतिनिधि सभा सदस्य भरतकुमार शाहले वर्तमान सरकारले हरेक क्षेत्रमा चर्को कर लगाएर नागरिकलाई मर्कामा पारेको बताए । कूल गार्हस्थ उत्पादनको २५ प्रतिशत योगदान करबाट असुलिएको बताउँदै उनले भारतमा भने करको योगदान १२ प्रतिशत मात्र रहेको बताए ।
कार्यक्रममा कांग्रेस नेता चन्द्र भण्डारी, नेकपा प्रदेश ५ का सांसद भोजप्रसाद श्रेष्ठ, कांग्रेस रूपन्देहीका सभापति अब्दुल रज्जाक, बुटवल उद्योग वाणिज्य संघका अध्यक्ष खिमबहादुर हमाल लगायतले पनि मन्तब्य राखेका थिए । कार्यक्रममा टेलिभिजनले बाँकेका अग्रज पत्रकार पन्नालाल गुप्ता, बुटवलका साहित्यकार जंग बहादुर शाह, गायिका मना छन्तेल र लन टेनिस प्रशिक्षक विकास खड्कालाई नगदसहित सम्मान पनि गरेको थियो ।