खोज

बुटवल, ४ भदौ ।

रुपन्देहीको तिलोत्तमा क्याम्पसले मास्टर्स इन बिजनेश एडमिन्स्ट्रेशन (एमबीए) कार्यक्रम सुरु गरेको छ । पोखरा विश्वविद्यालयबाट सम्बन्धन प्राप्त यो क्याम्पसले यसै शैक्षिक सत्रदेखि सुरु गर्न लागेको एमबीए कार्यक्रमको मंगलबार पत्रकार सम्मेलनमार्फत शुभारम्भ गरेको हो ।

एमबीए कार्यक्रम अन्तर्राष्ट्रिय बजारमा समेत अब्बल मानिन्छ । त्यसैले हरेक वर्ष एमबीए पढ्ने विद्यार्थीको संख्या बढिरहेको छ ।

नेपालमा त्रिभुवन विश्वविद्यालय, काठमाडौं विश्वविद्यालय, पोखरा विश्वविद्यालय, पूर्वाञ्चल विश्वविद्यालय, मध्यपश्चिम विश्वविद्यालय र सुदूरपश्चिम विश्वविद्यालयले एमबीए कोर्स सञ्चालन गरेका छन् ।

स्वालम्बी जनशक्ति तयार गर्ने मुख्य लक्ष्यसहित एमबीए कार्यक्रम सुरु गरिएको तिलोत्तमा क्याम्पसका प्राचार्य प्रा.डा. रामचन्द्र आचार्यले जानकारी दिए । “बीबीए कार्यक्रम सुरु गरेको १५ वर्षको प्रयासपछि बल्ल एमबीए कार्यक्रम सुरु गर्न सफल भएका छौं”–उनले भने । २०५६ सालदेखि पोखरा विश्वविद्यालयबाट सम्बन्धन पाएको क्याम्पसले २०६६ सालदेखि बीबीए कार्यक्रम सुरु गरेको थियो । यो कलेज २०५३ सालमा तिलोत्तमा नगरपालिका–२ मा स्थापना भएको हो ।

एमबीए कार्यक्रममा सबै विषयबाट स्नातक तह उत्तीर्ण गरेका विद्यार्थीले अध्ययन गर्न पाउने प्राचार्य डा. आचार्यले बताए । “आफ्नो अनुसन्धनात्मक क्षमता, कार्यकुशलता, प्रशासनिक दक्षता अभिवृद्धि गर्ने महत्वपूर्ण अवसर सबैलाई प्राप्त भएको छ”–उनले भने । एमबीए कार्यक्रमलाई पूर्णरुपमा अनुसन्धानमा आधारिक बनाइने पनि उनले बताए ।

क्याम्पसका अध्यक्ष रामचन्द्र ढकालले अनुसन्धानमा रमाउन चाहने विद्यार्थीका लागि यो कार्यक्रम कोशेढुंगा हुने विश्वास व्यक्त गरे ।

कार्यक्रममा नेपाल पत्रकार महासंघ रुपन्देहीका अध्यक्ष रामराज पोख्रेलले तिलोत्तमा क्याम्पसले शैक्षिक क्षेत्रमै छुट्टै पहिचान स्थापित गर्न सफल भएको भन्दै एमबीए कार्यक्रमको सफलताको कामना गरे ।

प्राध्यापक सन्तोष ज्ञवालीले यो विद्यार्थीहरुलाई स्वरोजगार बनाउनका लागि यो कार्यक्रम उपयुक्त विकल्प भएको बताए । तिलोत्तमा क्याम्पसले कक्षा १२ र स्नातक तहमा गरेर प्रति वर्ष करिव ७०० विद्यार्थी उत्पादन गरिरहेको छ । बीबीए कार्यक्रमका लागि कलेजले ४० जनालाई छात्रवृत्तिमा पढाइरहेको छ ।

एमबीए अध्ययनबाट के फाइदा हुन्छ ?

१. व्यवसाय संचालन गर्ने सिप सिक्न : यदि तपाईले आफ्नो व्यवसाय संचालन गर्न चाहनुु हुन्छ भने एमबीए कार्यक्रम तपाईका लागि राम्रो छनोट हुन सक्छ । यो विषयले व्यवसायलाई कसरी सफल र प्रतिष्पर्धी वनाउने भन्ने कुरामा राम्रो ज्ञान दिन्छ ।

२. साना तथा ठुला व्यवसायमा रोजगारीको संरक्षित गर्न : एमबीए कार्यक्रमले संस्था संचालन विधि तथा प्रकृया, समस्याहरुको समाधान, कर्मचारी तथा सरोकालवालाहरुको व्यवस्थापन, वित्तिय व्यवस्थापनका साथै अन्य विषयहरुको गहिरो शिक्षा प्रदान गर्दछ । ठुला तथा साना व्यवसायहरुले यस्ता कामहरुका लागि उत्तम जनशक्तिलाई जिम्मेवारी दिन चाहन्छन् ।

३. व्यावसायिक जोखिम चुनौती र अवसरहरुलाई सही तरिकाले पहिचान गर्न : एमबीए शिक्षाले विद्यार्थीहरुलाई ब्यापारिक अवसरहरु कसरी पहिचान गर्ने, जोखिमको कसरी न्युनीकरण गर्ने तथा ब्यावसायिक सफलताका रणनीतिक कार्यक्रम तथा नीतिहरु के हुन्छन् भन्ने कुराको ज्ञान दिन्छ ।

४. सकारात्मक सञ्चार सिपको विकास गर्न : एमबीए कार्यक्रमले विद्यार्थीहरुको सञ्चार सिपलाई राम्रो बनाउनका लागि सहयोग गर्छ । यसले गर्दा ब्यावसायिक जीवनमा सफल हुनका लागि सहयोग पुग्छ ।

५. ब्यावसायिक अनुशासन : विद्यार्थीहरुको २ बर्ष सम्मको अध्ययनमा विभिन्न तालिमहरुको माध्यमबाट र पाठयक्रमबाट तथा अन्य कार्यक्रमहरु मार्फत अनुशासनमा राख्न र रहन सिकाउँछ ।

६. समयको सही व्यवस्थापन : समय सबैभन्दा मूल्यवान वस्तु हो । एमबीए कार्यक्रमको अध्ययनको अवधिमा समयको कसरी सही व्यवस्थापन गर्न सकिन्छ भने कराको राम्रो ज्ञान लिन सकिन्छ ।

७.व्यावसायिक साथीहरुसंगकोे सञ्जाल विस्तार : एमबीए कार्यक्रममा पढ्ने विद्यार्थी एक जिम्मेवार व्यक्ति हुन्छ । कतिपयका आफ्नै व्यवसाय हन्छन् भने कसैका नयाँ ब्यवसाय गर्ने सोच हुन्छ । यी सवैको मिलनबाट नयाँ सोच र व्यवसायको साझेदारी हुन सक्छ र यो ठूलो अवसर बन्न सक्छ ।

८. पदोन्नती : लामो समयदेखि संस्थामा पदोन्नती नभएको खण्डमा कार्यक्रमको उपाधिले अवसरको ढोका खोल्न सक्छ । शैक्षिक योग्यताको वृद्धिसंगै अन्य संस्थाहरुमा पाइने अवसरहरु पनि हासिल गर्न सकिन्छ ।