खोज

दाङ, ३ वैशाख ।

संचार तथा सूचना प्रविधि मन्त्री रेखा शर्माले आम संचार नीति कस्तो बनाउने भन्ने विषयमा अवश्यक सुझावको अपेक्षामा सरकार रहेको बताएकी छन् ।

नेपाल पत्रकार महासंघ दाङ शाखाको २२ औं साधारणसभा तथा १२ औं अधिवेशन एवम् मिडिया महोत्सवको उद्घाटन समारोहलाई सम्बोधन गर्दै शर्माले संविधानको कार्यभार र कानुनमा उल्लेख भए अनुसारको जिम्मेवारी पूरा गर्न अब मिडिया र राजनीतिक क्षेत्रबाट अभियान चलाउनु पर्ने बेला आएको बताइन् ।

अहिले पनि महिला उत्पीडन, सिमान्तकृत समुदायका मुद्दा, अधिकार कार्यान्वयनको विषयमा चुनौति देखिएको हुँदा संविधानमा लेखिएका कुरा व्यवहारमा उतार्न मिडियाको सशक्त भूमिका हुनुपर्ने उनले बताइन् ।

’महिला उत्पीडनका कुरा व्यवहारमा उतार्न कार्यभार राज्यले लिने बनाउन मिडियाको सशक्त भूमिका हुनुपर्छ । संविधानमा लेखिएको मौलिक हकलाई अभियानात्मक रुपमा जिम्मेवार रुपमा मिडियाले भूमिका खेल्न सक्छ भन्नेमा म विश्वस्त छु’ उनले भनिन् ।

समाजमा नकारात्मक धारणाले स्थान पाउने अवस्था बन्दै जानु मुलुकका लागि अहित भएको भन्दै आशाको दियो बाल्न थोरै सही तर कोशिस गर्न ढिलाइ गर्न नहुने धारणा राखिन् । समाजमा नकारात्मक मात्रै छ भन्ने भाष्य गलत छ । के यहाँ कुनै कुरा सकारात्मक कुरा भएको छैन ? समाजको हितमा लागेकाहरुको भूमिका सकारात्मक छैन र ?’ उनले भनिन् ’अब आशाको दियो बाल्न थोरै सही तर कोशिस गरौँ । समाजका सफलताका कथा बाहिर ल्याउनु लागौेँ ।’

गणतन्त्र माथिको गलत लान्छना लगाउने विरुद्ध बलियो आवाज उठाउन मिडियाको मुल मुद्दा बनाउन उनले आग्रह गरिन ।

अभिव्यक्ति स्वतन्त्रता र राजनीतिक स्वतन्त्रता एक अर्काका परिपूरक रहेको उनको भनाई थियो । देशलाई अग्रगतिमा लैजान दुवै पक्ष गम्भीरतापूर्वक जनउत्तरदायी हुनुपर्नेमा जोड दिइन ।

कार्यक्रममा उनले आम संचारको क्षेत्रमा आएको परिवर्तनलाई व्यवस्थित गर्न पुनर्संरचना जरुरी रहेको औल्याइन् । आम संचार ऐन र प्राधिकरण गठन भईसकेपछि काम प्रकृयामा अघि बढेको छ’ उनले भनिन् ’सामाजिक संजाल विधेयक मन्त्री परिषदमा लैजाने तयारी भएको छ । साईबर सुरक्षा, सुचना प्रविधि लगायत ऐन अघि बढाउने तयारी भएको छ । साना लगानीका मिडिया र मोफसलका मिडिया सबलीकरणमा के गर्न सकिन्छ भन्ने विषयमा हामी गम्भीर छौँ ।’

कार्यक्रमको उदघाटन समारोहमा नेपाल पत्रकार महासंघ दाङ शाखा संस्थापक अध्यक्ष नारायणप्रसाद शर्माले राजनीतिमा देखिएको विकृति पत्रकारितामा भित्रिनु चिन्ताको विषय भएको बताए ।

सो अवसरमा बोल्ने वक्ताहरुले बदलिँदो परिवेशमा मिडियाले खेल्दै आएको भुमिका र अबका दिनमा गर्नुपर्ने कामका बारेमा भनाइ राखेका थिए ।

कार्यक्रममा पत्रकार महासंघका केन्द्रीय वरिष्ठ उपाध्यक्ष रमेश बिष्ट, अकोराबका अध्यक्ष अर्जुन गिरी, केन्द्रीय उपाध्यक्ष उदय जिएम, प्रेस काउन्सिल सदस्य शरद अधिकारी, नेपाल पत्रकार महासंघका केन्द्रीय सदस्य सुशील पोख्रेल, महासंघ प्रदेश उपाध्यक्ष शुक्रऋषि चौलागाई, पत्रकार महासंघ दाङ शाखा अध्यक्ष दुर्गालाल केसी, जिल्ला समन्वय समिति दाङका प्रमुख नित्यानन्द शर्मा, घोराही उपमहानगरपालिकाका नगरप्रमुख नरुलाल चौधरी, महासंघका सल्लाहकार सुदीप गौतम, लुम्बिनी प्रदेश प्रहरी प्रमुख प्रहरी नायव महानिरिक्षक कुवेर कडायत, नेपाली कांग्रेस दाङका सचिज अर्जुनकुमार योगी, नेकपा एमाले दाङका अध्यक्ष हुकुमबहादुर बस्नेत, नेपाल पत्रकार महासंघ दाङ शाखा निवर्तमान अध्यक्ष सविन प्रियासन, त्रिसिद्धेश्वरी राप्ती यातायात सेवा प्रालिका अध्यक्ष सुरेश हमाल, दंगीशरण गाउँपालिका अध्यक्ष शम्भु गिरी, बबई गाउँपालिका अध्यक्ष कुलबहादुर खत्री क्षेत्री, नेपाल पत्रकार महासंघ कास्की शाखा अध्यक्ष बिमला भण्डारी, नेकपा माओवादी केन्द्र दाङका ईन्चार्ज निर्मल आचार्य, दाङ जिल्ला उद्योग वाणिज्य संघका वरिष्ठ उपाध्यक्ष नरेशकुमार श्रेष्ठ, नागरिक समाज दाङका सचिव नारायणप्रसाद श्रेष्ठ, क्रियाशील पत्रकार महासंघ लुम्बिनी प्रदेश उपाध्यक्ष लीला शाह, प्रेस युनियन दाङका अध्यक्ष नारायण खड्का, प्रेस चौतारी दाङका अध्यक्ष प्रेमबहादुर राम्जा, प्रेस सेन्टर दाङका अध्यक्ष पाण्डव शर्मा, प्रगतिशील पत्रकार संगठन दाङका अध्यक्ष महेश रिजाल, जनपत्रकार संगठन दाङका अध्यक्ष हेमन्तप्रकाश वलीलगायत शुभकामना दिएका थिए ।

आरके शीतलले गरेका थिए । दुई दिन चल्ने कार्यक्रममा मिडियासँग सम्बन्धि विविध विषयमा बहस पनि हुदैछ । कार्यक्रममा बुटवल टुडेकर्मी रञ्जिता अधिकारी लगायत १७ जना पत्रकारलाई सम्मान एव पुरस्कृत गरिएको थियोे ।