खोज

मनु गुरुङ (निरु)
बुटवल, १८ असार ।

तिलोत्तमा नगरबासीका लागि निःशुल्क रक्तदान सेवा सुरु भएसँग राहत भएको छ । नगरपालिकाले तिलोत्तमाबासीलाई निःशुल्क रगत उपलव्ध गराउने व्यवस्था गरेसँगै नगरबासीलाई राहत मिलेको हो । नगरपालिकाले यसका लागि रक्तसञ्चार केन्द्र रुपन्देहीसँग २०७९ माघ २९ सम्झौता गरेको थियो । त्यसपछि फागुन १ गतेदेखि सुरु गरेको छ ।

नियमित डाइलासिस गराउँदै आएका तिलोत्तमा नगरपालिका १७ भरौलीयाका बासिन्दा अर्जुन बहादुर कार्कीले आफूले निःशुल्क रगत पाएपछि धेरै सहज भएको बताए । “मेरा दुईवटै मृगौला खराव छन्, विगत एक वर्षदेखि नियमित डाइलासिस गराउँदै आएको छु, मैले वर्षेनी ४, ५ पोका रगत निःशुल्क पाएको छु”–उनले भने ।

त्यस्तै तिलोत्तमा –८, ४ नम्बर मिलीजुली पथका बासिन्दा हरिकला पल्लीले निःशुल्क रगत पाउँदा निकै खुशी लागेको बताए । “नागरिकता र बसाइसराईको कागज लगेर गएपछि पाइँदो रहेछ किन्न परेको भए कति गाह्रो हुने थियो”–उनले भने ।

त्यस्तै तिलोत्तमा १३ निवासी बेनीमाधवलाई पिसाब थैलीबाट रगत बग्ने समस्या भएपछि रगत चढाउनु पर्ने भयो । निःशुल्क रगत पाएपछि उनी दंग भए ।

अहिले सम्म विपन्न परिवारका सदस्य मात्र होइन सबैलाई समेटेर निःशुल्क रगत बाडिएको नेपाल रेडक्रस सोसाइटीका अध्यक्ष कृष्ण चौहानले बताए । तिलोत्तमाका ३८५ जना स्थानीय बासिन्दाले नागरिकता वा बसाइसराईको प्रमाणपत्रको आधारमा निःशुल्क रगत प्रदान गरिएको छ । यसका लागि रक्तसञ्चार केन्द्रलाई नगरपालिकाले आवश्यक बजेटको व्यवस्था गरेको छ ।

तिलोत्तमा स्वास्थ्य शाखा धु््रवराज घिमिरेले नगरपालिकाले निःशुल्क रगत प्रदानका लागि रक्तसञ्चार केन्द्रसँग समझौता गरी बजेट उपलव्ध गराउँदै आएको बताए ।

तिलोत्तमा नगरपालिकाका उपप्रमुख जगेश्वर देवी चौधरीले कोही पनि नागरिक दुर्घटना, गर्भवती, रक्तअल्पता, किड्नी, रक्तचाप, डाइलासिस, अप्रेसन, बिरामी कसैले पनि ज्यान गुमाउन नपरोस् भन्ने उद्देश्यले यस्तो व्यवस्था गरिएको बताइन् ।
नगरवासीलाई निःशुल्क रगत तथा रक्ततत्व वितरण गर्ने तिलोत्तमा नगरपालिका सम्भवतः नेपालकैं पहिलो स्थानीय तह हो । तिलोत्तमा नगरपालिकामा बसोबास गर्ने नगरवासीमध्ये आर्थिक रुपमा विपन्न परिवारलाई लक्षित गरेर यो कार्यक्रम ल्याइएको हो । तर, यसमा सबैलाई खुला गरिएको छ ।
पछिल्लो समय देखा परेका क्यान्सर, मुटुको रोग, मिर्गौलाको समस्यालगायतका तमाम रोगको उपचारसँगै रगत पनि आवश्यक पर्ने भएकोले कम्तिमा रगतको सेवा शुल्क हामीले दिँदा बिरामीलाई थोरै भएपनि राहत मिल्ने ठानेर यो कार्यक्रम ल्याइएको उपप्रमुख चौधरीले बताइन् ।

खासगरी नियमित रगत चाहिने बिरामीहरु यो कार्यक्रमबाट बढी लाभान्वित भएको पाइएको छ । रगत किनबेच गर्ने वस्तु त होइन तर व्यवस्थापकीय कारण बिरामीले तिर्ने सेवा शुल्कको बोझ घटाउनु यस कार्यक्रमको उद्देश्य रहेको चौधरीले बताइन् ।
रगत निःशुल्क पाउन के—के प्रक्रिया अपनाउनुपर्छ ?
यो सुविधा तिलोत्तमा नगरपालिकामा स्थायी रुपमा बसोबास गर्नेहरुको लागि हो । यसैले स्थायी नगरवासीको प्रमाण नै यसको पहिलो प्रक्रिया हो । सम्बन्धित चिकित्सकले रगत चाहिने भनी गरेको सिफारिस तथा बिरामीले रक्त सञ्चार केन्द्रबाट सेवा शुल्क तिरेको बिल नगरपालिकामा पेश गर्नुपर्छ । बिरामीको नागरिकता वा जन्मदर्ता प्रमाणपत्र पनि संलग्न गरेर कागजात पेश गरेपछि सेवा शुल्क भुक्तानी पाउने व्यवस्था मिलाइएको छ ।