खोज

दाङ,२१ वैशाख । विद्यालयमा तल्लो तहबाट नै अक्षर सुधारका लागि आधारभूत तहका शिक्षकहरुलाई अक्षर सुधारका लागि तुलसीपुर उपमहानगरपालिकाले प्रशिक्षण सुरु गरेको छ । मुख्यमन्त्री शैक्षिक सुधार कार्यक्रमअन्र्तगत तुलसीपुर उपमहानगरपालिका युवा तथा खेलकुद महाशाखाको आयोजनामा अक्षर सुधार कार्यक्रम सुरु गरिएको हो ।
विद्यार्थीका अक्षर लेखनमा समस्या देखिएपछि शिक्षकबाटै अक्षर सुधार सुरु गरेको छ । नगरप्रमुख टीकाराम खड्काले तल्लो कक्षाबाट नै अक्षर सुधारको प्रयासबाट नै सफलता प्राप्त गर्न सकिने भएकाले अक्षर सुधारको कार्यक्रम अघि बढाएको बताए । नगरप्रमुख खड्काले विद्यार्थीको नेपाली र अङ्ग्रेजी अक्षर लेखनमा निकै समस्या देखिएपछि सुधारका लागि शिक्षकहरुको अक्षर सुधार बाटै सुरुवात् गरिएको बताए । उहाँले यसै शैक्षिक सत्रमै नतिजा देखिने गरेर अक्षर सुधारको कार्यमा लाग्नका लागि निर्देशन दिएका हुन् ।
सामाजिक विकास समितिका संयोजक मानबहादुर रावतले शिक्षकलाई नेपाली समाजमा लेखनका लागि विगतदेखि मानक मान्दै आएकाले त्यो विरासतलाई यथावत् अवस्थामा राख्नका लागि आग्रह गरे । उनले प्रविधिको विकाससंगै लेखन कार्यहरु भुल्दै जाँदा अक्षर सुधारमा समस्या सिर्जना भएको बताए । शिक्षा शाखाका प्रमुख चक्रबहादुर भण्डारीले अक्षर सुधारका लागि तल्लो तहका शिक्षक शिक्षिकालाई पहिलो प्राथमिकतामा राखेर प्रशिक्षण सुरु गरिएको बताए ।
उनले अक्षर लेखनसिपलाई आफूमा मात्रै सीमित नराखी विद्यार्थीहरुको सिकाईमा समेत देखिनुपर्ने बताउनुभयो । ८३ वटा सामुदायिक विद्यालयका शिक्षक/शिक्षिकाहरुको सहभागिता रहेको छ ।।।