खोज

झिमरुक गाउँपालिका–४ बांगेमरोठको भगवती कोट मन्दिरमा विजयादशमीको बाह्रौ दिनमा लाग्ने द्वाद्वसी मेलाको सरायँ नाचमा यूवापुस्ताको आकर्षण देखियो । यूवाहरू उत्साहजनक रूपमा सरायँमा सहभागी भए । विभिन्न कामको शिलशिलामा घरदेखि बाहिर रहेका यूवाहरू दशैँमा आएको बेला सरायँमा झुमेका हुन् । यूवाहरूसँगै बृद्धबृद्धाहरूले पनि साथ दिए । लोप हुँदै गएको सरायँमा आकर्षण बढ्दै गएपछि स्थानीय खुसी भएका छन् । अघिल्लो वर्षको तुलनामा यसवर्ष दर्शनार्थीको संख्यामा समेत सहभागीता बढ्यो । द्वाद्वसीमा बांगेमरोठमा मात्र सरायँ मेला लाग्ने गर्छ ।
वि.सं १९६० सालदेखि यहाँ वर्षेनी सरायँनाच भइरहेको छ । मन्दिरमा सवै जातजातीहरूको उत्साहजनक सहभागीता हुनेगर्छ । गाउँमा सवै जातीहरूको बसोवास रहेको ४८ वर्षदेखि निरन्तर पुजापाठ गर्दै आएका पुजारी विर बहादुर जिसीले बताए । ‘भगवती मन्दिरको दर्शन गरेपछि मनोकांक्षा पुरा हुने विश्वास छ’, उनले भने, ‘मरोठका धनीहरूले मन्दिर स्थापना गरेका थिए । अहिले गाउँलेको चन्दाबाट मन्दिर चलेको छ ।’ मन्दिरमा वर्षौ अघिदेखिका सरायँमा प्रयोग हुने हातहतियारहरू रहेको उनले बताए । खुडा, तरवार, त्रिशुल, भुझेरी, चक्कु लगायतका हतियारहरू सरायमा प्रयोग हुने गर्छन् । यिनै हतियारसहित खड्क यात्रा निकालिने गरिन्छ । घटस्थापनाको दिनदेखि विजयादशमीसम्म दैनिक महाकाली, महालक्ष्मी र महासरस्वतीको पूजा गरिने पुजारीको भनाई छ । पाँचवटा आलामलाई गाउँकै चिद्दारा पँधेरामा लगेर फूलपाती सेलाउने गरिन्छ । आलाम लैजानका लागि तल्लो बांगे, उपल्लो बांगे, चौर, काउछे, बौडा, हरिया, टिमिलडाँडा, सुमन्तेकाना लगायत गाउँका यूवाहरूको होडवाजी हुनेगर्छ ।
जिर्णद्वार मन्दिरको संरक्षण नहुँदा समस्या भइरहेको कोट व्यवस्थापन समितिका अध्यक्ष डेगेन्द्र विक्रम जिसीले गुनासो गरेका छन् । समाजमैत्री मन्दिर नहुँदा पूजापाठ गर्न समस्या भइरहेको देखिएको छ । मन्दिर परिसरमा तारजाली नहुँदा गाई बाख्राको चरनक्षेत्र बन्ने जोखिम देखिन्छ । निश्चित व्यक्तिहरूले चन्दा संकलन गरेको भरमा कोट संचालन भइरहेको व्यवस्थापन समितिले जनाएको छ । मन्दिरको संरक्षणका लागि सरकारी निकायबाट सहयोग नपाएको समितिले गुनासो गरेका छन् । झिमरुक गाउँपालिकाले गत आर्थिक वर्ष पर्खाल निर्माणका लागि एक लाख रूपैयाँ सहयोग गरेपनि उक्त काम बीचमै अधुरै बनेको छ । यसवर्ष कोट व्यवस्थापनका लागि बजेट विनियोजन नभएको झिमरुक गाउँपालिका अध्यक्ष तिलक जिसीले बताए । कोजाग्रत पूर्णिमाको दिनमा समेत जिल्लाका विभिन्न ठाउँमा सरायँ मेला लागेको छ । प्यूठान नगरपालिकास्थित विजयनगर सापडाँडाका स्थानीयले जुम्रिबजारमा सरायँ प्रदर्शन गरे ।