खोज

बिहीबार भैरहवाको ब्यस्त चोक देवकोटा चोकमा नेपाल राष्ट्र बैंक अगाडि लु१ख ४६७१ नम्बरको माइक्रो बसले जेब्राक्रसमै रोकेर यात्रु चढाउँछ, त्यस लगत्तै आउने अर्को बस लु२ख २११८ नम्बरको बसले पनि सोही जेब्राक्रसमा यात्रु उतार्ने र चढाउने कार्य गर्छ ।
यो सबै नजिकै रहेका तथा ट्राफिक ब्यवस्थापनमा खटिएका ट्राफिक प्रहरी छविलाल थापाले नियालि रहेका थिए । ो त्यस चोकको दैनिकी नै भए जस्तो उनले कुनै प्रतिक्रिया नै जनाएनन् । मानौं यो पनि ट्राफिक नियमकै एक हिस्सा हो ।
बढ्दो शहरीकरण संगै भैरहवाको मूख्य मार्गहरूमा ट्राफिक ब्यवस्थापन फितलो हुँदा दुर्घटनाको जोखिम बढाएकै छ भने सबै भन्दा बढी सास्ती पैदल यात्रुले भोग्ने गरेका छन् ।
बेलहिया–बुटवल ब्यपारीक मार्ग विस्तार भएपछि यस्तो जोखिम झन बढेको हो । बिशेषगरि माईक्रो बसहरूको अटेरी र यात्रुहरूमा सचेतनाको कमीले जोखिम बढाएको छ । त्यसमाथि ट्राफिक प्रहरीले ट्राफिक नियम मिचिँदा समेत कानमा तेल हालेर बसिदिँदा यस्ता कानून मिच्नेहरूको मनोबल बढ्दै गएको छ ।
बेलहिया–बुटवल गुड्ने माइक्रो बसहरू ट्राफिक प्रहरीकै अगाडी जेब्राक्रसमा गाडी रोकि यात्रु ओराल्ने र चढाउने गरेका छन् । बिशेष गरि मूख्य बाटोमा पर्ने देवकोटा चोक, बुद्ध ज्योती स्कूल अगाडी, काशी सिनेमा अगाडी जेब्राक्रसमै माईक्रो बस रोकेको दृश्य समान्य हुन थालेका छन् । दश कदमको दुरीमै बस बिसौनीहरू छन, तर बस बिसौनीमा न बस रोकिन्छ नत यात्रुहरूलाई नै त्यहाँ बस कुर्ने धैर्य छ । बस बिसौनीहरू सडक निर्माणका क्रममा त्यसै बनाईए जस्ता छन् ।
“जेब्राक्रसमै बस रोकिदिदा पछाडीबाट आउने सवारी देखिँदैन, कतिपय अवस्थामा दुर्घटनाबाट जोगिएको छु ।” बुद्धज्योति स्कूलमा छोरा पु¥याउन जाँदै गरेका एक अभिभावकको गुनासो हो यो । देवकोटा चोकमा ट्राफिक ब्यवस्थापनको लागी सधै ट्राफिक प्रहरीको उपस्थिति हुने गरेका छन तर उनीहरूहरूलाई यो सब देखिँदैन । पछिल्लो समय भैरहवाको भित्रि बाटोहरूमा केन्द्रित रहेका छन् । पार्किङ्ग ब्यवस्थापनमा खटिने प्रहरीले साना गाडीका सामान्य गल्तीमा पनि चिट काट्ने, जरिवाना तिराउने गरेको छ । तर जोखिम बढाउने माईक्रो बस जस्ता ठूला सवारी साधनहरूको सबै गल्तीहरू प्रहरीले हेरेर पनि नहेरेको जस्तो गर्ने स्थानिहरूको आरोप रहेको छ । ट्राफिक प्रहरीकै अगाडी यस्ता बसहरूले नियम मिच्दा जरिवाना काट्ने वा सम्झाउने कुरा त परै जाओस प्रहरीहरू उनिहरूकै समर्थन गरेको भेटिन्छन् ।
रूपन्देही ट्राफिक प्रहरी प्रमुख ट्राफिक प्रहरी निरिक्षक बेद बहादुर पौडेलले पनि बसहरूले जेब्राक्रसमै बस रोकि बस बिसौनी झै यात्रु झार्ने र चढाउने गरेको स्विकार गर्छन । उनले यो प्रक्रिया यहाँ चलनकै रूपमा विकसीत भएको बताए । यात्रु चढाउने र झार्ने ठाउँ नै तोकिदिएपनि यो प्रक्रिया रोक्न नसकेको बताए । यसको लागी जनचेतनामुलक कार्यक्रम र कार्यवाही प्रक्रिया दुईटै अगाडी बढाइएको ट्राफिक प्रहरी प्रमुख पौडेलको भनाई छ ।