खोज

संविधान दिवसको अवसरमा पारेर प्रदेश सरकार प्रदेश नं. ५, सामाजिक विकास मन्त्रालयले बुटवलमा खुल्ला रक्तदान गरेको छ । नेपाल रेडक्रस सोसाईटी, रक्तसंचार केन्द्रको प्राविधिक सहयोगमा भएको कार्यक्रमको बुटवल उपमहानगरपालिकाका नगरप्रमुख शिवराज सुवेदीले रक्तदातालाई ब्लडब्याग दिएर उद्घाटन गरेका थिए । संविधान दिवस मुल समारोह समितिका सदस्य सचिव डा. मान महादुर बिकले संविधान दिवसलाई लुम्बिनी अञ्चल अस्पतालका विरामीहरूलाई फलफुल वितरण तथा रक्तदान कार्यक्रम गरि मनाईएको बताए ।

कार्यक्रममा सामाजिक विकास मन्त्रालयका निमित्त सचिव थानेश्वर ज्ञवाली, नेपाल रेडक्रस सोसाईटी, लुम्बिनी अञ्चल अस्पतालका मेसु डा.कृष्ण खनालले रक्तदानको महत्वबारे प्रकाश पारेका थिए । रूपन्देही जिल्ला शाखाका सभापति प्रेमलाल उदासले यस क्षेत्रमा रगतको अभावलाई स्वयंसेवी रक्तदाताहरूको सहयोगमा पुरा गरिरहेको बताए । एउटा ब्यक्ति निरन्तर र नियमित रूपमा ३ महिनामा रक्तदान गर्नसक्ने भन्दै उनले यो स्वस्थ्य हुनुको प्रमाणसमेत भएको बताए । कार्यक्रममा ४० युनिट रगत संकलन भएको केन्द्रका प्राविधिक प्रमुख राधा शर्माले बताईन । रक्तदाताहरूलाई नगरप्रमुख शिवराज सुवेदी, समितिका सदस्य सचिव डा मान महादुर बिकले प्रमाणपत्रबाट सम्मान गरेका थिए ।
फलफूल वितरण
संविधान दिवसको अवसरमा प्रदेश नम्बर ५ प्रदेश स्तरीय संविधान दिवस मुल समितिको आयोजना र भुमि व्यवस्था कृषि तथा सहकारी मन्त्रालयको व्यवस्थापनमा लुम्बिनी अञ्चल अस्पताल बुटवलमा फलफूल वितरण गरिएको छ ।

मुल समारोह समितिका सदस्य सचिव डा. मान महादुर बिक, भूमि व्यवस्था कृषि तथा सहकारी मन्त्रालयका सचिव यम नारायण देवकोटा, उपसचिव विनोद घिमिरे, बुटवल उपमनगरपालिका प्रमुख शिवराज सुवेदी, लुम्बिनी अञ्चल अस्पतालका मेडिकल सुपरिटेण्डेन्ड डा. कृष्ण प्रसाद खनाल लगायतका सहभागीतामा लुम्बिनी अञ्चल अस्पताल रहेका विरामीहरूलाई फलफूल वितरण गरिएको हो ।