खोज

अपाङ्गता भएका व्यक्तिहरूको समस्या पहिचानमा नै समस्या भएको भन्दै उनीहरूको क्षमता पहिचान गरी कार्यक्रम अगाडी बढाउनुपर्ने एक कार्यक्रमका सहभागीहरूले जोड दिएका छन् । बुटवलमा भएको स्थानिय संस्थाहरूको समावेसी शिक्षा सम्बन्धी क्षमता अभिवृद्धि कार्यक्रम, समावेशी शिक्षा सम्बन्धी सचेतना कार्यक्रममा बोल्दै सहभागीहरूले आपङ्गताको क्षेत्र धेरै विस्तृत भएको भन्दै यसलाई पहिचान गरी ठोस रूपमा कार्य अगाडी बढाउनुपर्नेमा जोड दिएका हुन् ।
कार्यक्रममा बोल्दै बुटवल उपमहानगरपालिका शिक्षा महाशाखा प्रमुख उपसचिव लोकराज पन्थीले विद्यालय भर्ना भएका अपाङ्गता भएका बालबालिकाहरूको लागि नगरपालिकाले विभिन्न कार्यक्रमहरू सञ्चालन गर्दै आएको जानकारी दिए । सामावेसी रूपमा कार्य अगाडी बढाइएको जनाउँदै उनले विद्यालय भर्ना दर ९८.१ प्रतिशत रहेकोले अझै आत्तीहाल्नु अवस्था नरहेको बताए । अहिले पनि १.९ प्रतिशत बालबालिका विद्यालय वाहीर रहेको भन्दै उनले विद्यालयमा विद्यार्थी टिकाउने र सिकाउने शैलीको विकासमा लागिएकोले समावेशी शिक्षा, अनुकुल शिक्षाको अभियान सरकारको तहबाट जारी रहेको बताए ।
जिल्ला समन्वय समिति रूपन्देहीका प्रमुख एकराज विश्वकर्माले अपाङ्गता भएका बालबालिकाहरूको शिक्षाको लागि अझै पनि सरकारी स्तरबाट ठोस काम नभएको भन्दै यसमा सबैको हातेमालो आवश्यक रहेको बताए । विद्यालयमा अपाङ्गता भएका व्यक्तिहरू ल्याएर भर्ना गरेपनि उनीहरूलाई सिकाउने प्रविधिको विकास अझै सहज रूपमा नभएको भन्दै उनले यसमा अवको ध्यान केन्द्रीत रहेको बताए । पुनःस्थापना र विकासका लागि स्रोत केन्द्र भक्तपुरको आयोजना, एच् आर डिसी र राष्ट्रिय अपाङ्ग महासंघको स्थानिय संमन्वय र सिविएम नेपालको सहयोग रहेको कार्यक्रममा बोल्दै राष्ट्रिय अपाङ्ग महासंघका केन्द्रीय सदस्य तथा प्रदेश ५ संयोजक शिव प्रसाद ज्ञवालीले अपाङ्गता भएका व्यक्तिहरूको समावेसीकरणको विषयमा आजैबाट सरोकारवाला निकायले सोंच्नुपर्ने बेला आएको बताए । उनले केकसरी समावेसीकरण गर्न सकिन्छ भन्ने विषयमा सबैको ध्यान जानुपर्नेमा जोड दिए । पुनस्थापना र विकासका लागि स्रोत केन्द्र भक्तपुरका सुर्यभक्त प्रजापतीले कार्यक्रममा सहजीकरण गरेका थिए । कार्यक्रममा बुटवल उपमहानगरपालिका सामाजिक विकास महाशाखा बरिष्ठ अधिकृत दामोदर ज्ञवाली, सैनामैना नगरपालिकाका नारायण प्रसाद पौडेल, पिएनएलकी मना पाण्डे लगायतले बोलेका थिए ।