खोज

प्रदेश ५ को प्रदेश सरकारले पूर्वि प्रवेशद्वार पश्चिम नवलपरासीको बर्दघाट नगरपालिका वडा नं. ४ दाउन्ने डाँडामा कलात्मक र आधुनिक प्रवेशद्वार निर्माण गर्ने भएको छ । प्रवेशद्धार निर्माण स्थलको प्रदेशका मुख्यमन्त्री शंकर पोखरेलले अवलोकन गरेका छन् ।
प्रदेश ५ को सीमा शुभारम्भ स्थलमा निर्माण हुने सो प्रवेशद्वार ऐतिहासिक जितगढी किल्लाको झल्को दिने गरी निर्माण हुने मुख्यमन्त्री पोखरेलले बताए । प्रदेश ५ कै पहिचानसँग जोडिएकोले प्रवेशद्वारको डिजाईन भने बन्ने तयारीमा रहेको समेत उनले जानकारी दिए ।
प्रवेशद्वारमा आवातजावत गर्ने सवारीको निगरानी गर्ने प्रविधि समेत जडान गरिने उनले जानकारी दिए । प्रवेशद्वार निर्माणका लागि प्रदेश सरकारले रु. ८० लाख बजेट विनियोजन गरेको बर्दघाट नगरपालिकाका मेयर धीरज शर्मा बस्यालले जानकारी दिए ।
प्रदेशकै प्रवेशद्वार बर्दघाट नगरपालिकालाई समृद्ध र नमुना नगर बनाउन नगरपालिकाले पहल गरिरहेको र प्रदेश सरकारले पनि यथासक्य सहयोग गर्ने विश्वास नगरपालिकाको रहेको नगर प्रमुख बश्यालले बताए । मुख्यमन्त्री पोखरेललाई प्रदेश सांसद दिपेन्द्र अधिकारी, बर्दघाट नगर प्रमुख बस्याल, पूर्व सभासद कृष्ण पौडेल तथा स्थानीय नगरबासीहरूले स्वागत गरेका थिए ।