खोज

सल्यान, १३ असार ।  स्थानिय तह, पशु सेवा कार्यालय र किसानको लागत साझेदारीमा माउ भैंसी वितरण गरिएको छ । जिल्लाको त्रिवेणी गाउँपालिकास्थित भैंसी पकेट क्षेत्रका किसानलाइ उन्नत जातका १५ माउ भैंसी वितरण गरिएको हो । ‘एक पालिका एक पशु वस्तु उत्पादन’ कार्यक्रम अन्तर्गत त्रिवेणी गाउँपालिका — ३, काराबासका शारदा भैसीपालक कृषक समुहमा आवद्ध किसानलाई उन्नत जातका भैँसी वितरण गरिएको गाउँपालिकाको कार्यालयले जनाएको छ । पशु अस्पताल तथा पशु सेवा कार्यालय सल्यानको ७० प्रतिशत, गाउँपालिकाको १० प्रतिशत र किसानको २० प्रतिशत लागतमा भैँसी ल्याइएर वितरण गरिएको त्रिवेणी गाउँपालिका अध्यक्ष खिम बहादुर रावतले जानकारी दिए । पशु अस्पताल तथा पशु सेवा कार्यालयको १५ लाख रुपैया, त्रिवेणी गाउँपालिकाको ३ लाख रुपैया र समूहको ३ लाख ५० हजार गरी २२ लाख ५० हजार रुपैयाको लागतमा १५ भैँसी, मिल्क क्यान, वर्षे घाँसका बेर्ना, तालिम र मिनिरल वितरण गरिएको गाउँपालिकाको पशु विकास शाखाले जनाएको छ । आफूले लगानी नगरेसम्म नहुने भएकाले थोरै भएपनि किसानलाई लगानी गर्ने अभियान पालिकाले थालनी गरेको गाउँपालिका अध्यक्ष रावतको भनाई छ । त्रिपक्षीय साझेदारीमा काम गरिएकाले भैँसी पालन प्रभावकारी हुने उनको विश्वास छ । आफुले विगतदेखि भैँसी पालन गर्दै आइरहेको भन्दै स्थानिय कृषक खिम बहादुर शाहले थप उन्नत जातका भैँसी पाउँदा व्यवसायीक पशु पालनमा ठूलो मद्दत र हौसला मिलेको बताए । उत्पादन भएको दूध संंकलनका लागि दुग्ध सङ्कलन केन्द्र तथा चिस्यान केन्द्र पनि गाउँपालिकाले स्थापना गरिदिएकाले उत्पादित दुधको बजारिकरणमा समस्या नरहेको भैंसीपालक कृषकहरुको भनाइ छ । दूधमा आत्मनिर्भर बनाउन र कृषिमा किसानहरूको आकर्षण बढाउन उन्नत जातका भैँसी वितरण गरिएको पशु अस्पताल तथा पशु सेवा कार्यालय सल्यानका प्रमुख गोविन्द महतले जानकारी दिए । किसानको आर्थिक सामाजिक जीवन स्तर उकास्न र दूधमा जिल्लालाई आत्मनिर्भर बनाउन विगतका वर्षहरू झैँ यस वर्ष पनि व्यावसायिक किसानलाई भैँसी वितरण गरिएको उनको भनाई छ । कर्णाली प्रदेश सरकारले प्रति लिटर ५ रुपैयाँ अनुदान दिन थालेपछि व्यावसायिक भैँसी पालन गर्ने किसानहरूको संख्यामा समेत वृद्धि आएको महतको भनाई छ । यस वर्ष दूध उत्पादनमा वृद्धि गर्न त्रिवेणीमा १५, दार्मा गाउँपालिकामा १५ र बागचौर नगरपालिकामा १५ उन्नत जातका भैँसी वितरण गरिने कार्यालयले जनाएको छ।
सडक करीडोरलाई लक्षित गरी दुग्ध उत्पादन कार्यक्रमलाई अघि बढाईरहेको त्रिवेणी गाउँपालिका पशु सेवा शाखा प्रमुख वसन्त रावतले जनाए । सडक करिडोर अन्तर्गत पालिकाको वडा नम्बर १, ३ र ६ लाई भैँसी पकेट क्षेत्र निर्धारण गरी कार्यक्रम सञ्चालन गर्दै आइरहेको उनको भनाई छ । भैंसी वितरण कार्यक्रममा गाउँपालिकाका प्रमुख प्रशासकीय अधिकृत राम बहादुर बुढा, वडा नं ३ का वडा अध्यक्ष कर्ण बहादुर डागीले सामुहिक कृषिमा जोड दिन सुझाव दिए ।