खोज

नेपाली महिलाहरूको मुख्य चाडको रूपमा रहेको हरितालिका तीजलाई तडकभडक नगरी सभ्य तीजको रूपमा मनाउनुपर्नेमा जोड दिइएको छ । नेपाल पत्रकार महासंघ रूपन्देहीको आयोजनामा बुटवलमा भएको ‘सभ्य तीजको लागि हाम्रो भूमिका’ विषयक अन्तरक्रिया कार्यक्रममा बोल्दै प्रदेश सभा प्रदेश नम्बर ५ की उपसभामुख कृष्णी थारुले मौलिकता जोगाउनको लागि अहिलेको समाजमा चुनौति बढ्दै गएको भन्दै त्यसलाई कायम राख्न तीजलाई तीजकै रूपमा मात्रै मनाउनुपर्ने बताएकी हुन् ।
कार्यक्रममा बोल्दै उनले भनिन्–‘पछिल्लो समयमा तडकभडक बढ्दै गएको छ, व्यक्ति व्यक्ति पिच्चे फरक फरक हरितालिका आउने गरेको छ, यसलाई तीजको रूपमा मात्रै मनाउनको लागि म आग्रह गर्दछु ।’ नेपाली मौलिक चाडपर्वमा पछिल्लो समयमा छाडा संस्कृतीले प्रवेश पाउन थालेको भन्दै उपसभामुख थारुले यसलाई रोक्न, सचेतना फैलाउनको लागि सञ्चार जगतको महत्वपूर्ण भूमिका रहेको समेत धारणा राखिन् ।
कार्यक्रममा नेपाल पत्रकार महासंघ प्रदेश नम्बर ५ का अध्यक्ष मौसम रोका मगरले परिवर्तन संगै तीजमा पनि मौलिकता हराउँदै गएको भन्दै यसलाई सहि धारमा डो¥याउने दायित्व मिडियाको रहेको बताएका थिए । कार्यक्रममा अग्रज पत्रकार दुर्गा पौडेलले नेपाली तीज संस्कृतीले ३ खण्डमा विभाजन गरेको बताईन् । उनले पहिला आफ्नो व्यथा सुनाउने महिलाहरूले केही बर्ष पछि आफ्नो अधिकार, हक र परिर्वतनका कुरा गर्दै पछिल्लो समयमा आधुनिक युग, परम्पराको साटो आधुनिकताको विषयमा कुरा उठाउँदै आएको बताईन् । उनले महिलाहरूको मुख्य पर्वको रूपमा रहेको तीजलाई सभ्य र मौलिक चाडपर्वको रूपमा विकास गर्नु सबैको दायित्व भएको समेत बताएकी थिइन् ।
सैनामैना नगरपालिकाको सहयोगमा आयोजना भएको कार्यक्रममा नेपाल पत्रकार महासंघ रूपन्देहीका पूर्व अध्यक्ष हरि लम्साल, प्रेस युनियन रूपन्देहीकी उपाध्यक्ष रेखा भुषाल, क्रियाशिल पत्रकार महिला रूपन्देहीकी अध्यक्ष भगवती पाण्डे, नेपाल पत्रकार महासंघ रूपन्देहीकी उपाध्यक्ष निरु गौतम, सदस्य सञ्जु पौडेल, माया केसी लगायतले आ–आफ्नो धारणा राखेका थिए ।