खोज

कपिलवस्तु, १३ असार    कपिलवस्तु नगरपालिकालाई पुर्ण साक्षर नगर घोषणा गरिएको छ । यसअघि नगरका १२ वटै वडा साक्षर घोषणा भए पनि हालसम्म नगरलाई पुर्ण साक्षर घोषणा गरिएको थिएन । लुम्बिनी प्रदेशसभाका सदस्य सुधाकर पाण्डेयले साक्षर घोषणाको ब्यानर पढेर नगरलाई पुर्ण साक्षर घोषणा गरे । कपिलवस्तु नगरपालिका घोषणा सगै लुम्बिनी प्रदेशलाई साक्षर प्रदेश घोषणा गर्न बाधक बनेको कपिलवस्तु जिल्लामा साक्षर घोषणा अभियानले तिव्रता पाएको छ । १५ बर्ष देखी ६० बर्ष उमेर समुहका ९५ प्रतिशत बढि नागरिक साक्षर भए पछि नगरलाई पुर्ण साक्षर घोषणा गरिएको घोषणासभामा जानकारी दिईएको हो ।
कपिलवस्तु नगरपालिकाका शिक्षा ईकाई प्रमुख उपसचिव हरि प्रसाद ज्ञवालीले यस अघि नगरका १२ वटै वडा साक्षर घोषणा भै सकेको आधारमा नगरलाई साक्षर घोषणा गर्न थािलएको स्पष्ट पारे । हालै सार्बजनिक भएको नेपालको जनगणना २०७८ को प्रतिवेदनमा तोकिएको नगरको सक्रिय जनसंख्या ५२ हजार २ सय २० मा सरकारले निर्धारण गरेको साक्षरताका १२ वटा सुचक मध्य ५० प्रतिशत भन्दा बढि सुचक पुरा गर्न सक्षम भएको देखाएको उनले जनाए । जिल्लामा आव २०७१ देखी ७३ को अबधी सम्म निरक्षरको संख्या संकलन गरि साक्षरताको कार्यक्रम अगाडी बढाईएको जिल्ला शिक्षा बिकास समन्वय ईकाई कपिलवस्तुका प्रमुख थानेश्वर घिमिरेले जानकारी दिए ।
मंगलबार कपिलवस्तु नगरपालिका र बिजयनगर गाउँपालिका एकै साथ साक्षर घोषणा हुन थालेको उनले प्रष्ट्याए । मायादेवी गाउँपालिका घोषणाको अन्तिम चरणमा रहेको र यशोधरा गाउँपालिका तथा कृष्णनगर गाउँपालिकाले पनि घोषणाको तयारी अगाडी बढाएको जनाउदै छिट्टै कपिलवस्तु जिल्ला तथा लुम्बिनी प्रदेशनै साक्षर घोषणा हुने घिमिरेको भनाई थियो । कार्यक्रममा नगरलाई साक्षर बनाउन भुमिका खेल्ने बिभिन्न संघ संस्था, कर्मचारीहरुलाई सम्मान गरिएको थियो । निरक्षरता पछौटेपनको उदाहरण रहेकाले नगरलाई साक्षर घोषणा सगै साक्षरताका कार्यक्रमलाई प्राथमिकता दिन आवश्यक रहेको वडा नम्बर ३ का अध्यक्ष प्रकाश गैरेले बताए ।
अब साक्षरता मात्रै होईन प्रबिधीमा पनि अभ्यस्त हुनु पर्ने समय आएको सहायक प्रमुख जिल्ला अधिकारी अनिल कुमार पौडेलको सुझाव थियो । नगर साक्षर घोषणा सगै साक्षर घोषणाको पुष्ट्याई हुने कार्यक्रम अगाडी बढाउन आवश्यक रहेकोे जिल्ला समन्वय समिती कपिलवस्तुका प्रमुख बाबुराम आचार्यले सुझाव दिए । साक्षरता घोषणा सगै साक्षर नगरबासीलाई राम्ररी बुझन सक्ने बनाउन आवश्यक रहेको लुम्बिनी प्रदेशसभा सदस्य सुधाकर पाण्डेयले बताए । आफुले संसद कोषको बजेटलाई शिक्षाका क्षेत्रमा लगानी गरेको स्पष्ट पार्दै प्रदेश सरकारको प्राथमिकता समेत कृषी पछि शिक्षा नै रहेको उनले जानकारी दिए । नगरपालिकाका सामाजिक बिकास समितिका संयोजक दिरेप कुमार चौधरी, नगरपालिकाका शिक्षा अधिकृत युवराज भुसाल लगायतले नगरलाई साक्षर घोषणा पछि पनि साक्षरता सम्बन्धि कार्यक्रमको निरन्तरता रहने स्पष्ट पारे ।