खोज

बुटवल,२२ बैशाख । रुपन्देहीको ग्रेस फार्मास्युटिकल्स प्रालिले ‘बेस्ट नेसनल आयुर्वेद फार्मा कम्पनी’ को अवार्ड जितेको छ । आयुर्वेद मेडिकल डेभलपमेन्ट एण्ड रिसर्च सेन्टर काठमाडौंले देशभरका करिब ३५ वटा आयुर्वेद औषधि उद्योगहरुमा अध्ययन गर्दा तिलोत्तमा–११ मा उद्योग रहेको ग्रेस फार्मास्युटिकल्सले प्याटेन्टतर्फ उत्कृष्ट उद्योगको अवार्ड जितेको हो ।

उक्त संस्थाले पहिलोपटक आयुर्वेदका विभिन्न क्षेत्रका उत्कृष्ट उद्योग, चिकित्सक, स्वास्थ्यकर्मी लगायतलाई अवार्ड वितरण गरेको हो । २०६७ सालमा स्थापना भई हाल ६५ प्रकारका औषधि उत्पादन गर्दै आएको ग्रेस फार्मास्युटिकल्स गुड म्यानुफ्याक्चरिङ प्राक्टिस (जीएमपी) सर्टिफाइड कम्पनी हो ।
अवार्ड पाएको ग्रेस फर्मास्युटिकल्सका प्रबन्ध निर्देशक सुरज भट्टराईले गुणस्तरीय औषधि उत्पादन,लगानी र रोजगारी लगायतका विषय मूल्याङकनमा उत्कृष्ट ठहर भई अवार्ड पाउन सफल भएको बताए ।

‘यो सफलतामा उद्योगका लगानीकर्ता, सञ्चालकदेखि कर्मचारी सबैको उत्तिकै योगदान छ, यो अवार्डले हामीलाई थप गुणस्तरीय औषधि उत्पादनमा हौसला थपिएको छ’–भट्टराईले भने ।

नेपालका आयुर्वेद औषधी उत्पादन गर्ने उद्योगहरु मध्ये ग्रेस सहित २ वटाले मात्र जीएमपी प्रमाणपत्र पाएका छन् ।
यस्तै क्लासिकलतर्फ बेस्ट नेसनल आयुर्वेद फार्मा कम्पनीको अवार्ड भाष्कर हर्बस्युटिकल्स प्रालि बिरगंजले प्राप्त गरेको छ । बेस्ट इन्टरनेसनल आयुर्वेद फार्मा कम्पनी प्याटेन्टको अवार्ड हिमालय वेलनेस कम्पनी काठमाडौंले र बेस्ट इन्टरनेसनल आयुर्वेद फार्मा कम्पनी क्लासिकलको अवार्ड वैद्यनाथ आयुर्वेद भवन प्रालि काठमाडौंले पाएको छ । कुल ३७ वटा विधामा अवार्ड वितरण गरेको संस्थाले ५ जना आयुर्वेद चिकित्सक र एकजना योगा विज्ञलाई पनि अवार्ड प्रदान गरेको आयोजक संस्थाका अध्यक्ष डा. विजेन्द्र शाहले जानकारी दिए ।
आयुर्वेद क्षेत्रलाई थप प्रभावकारी र गुणस्तरीय बनाउन पहिलोपटक अवार्ड वितरण थालिएको र यसलाई निरन्तरता दिने उनले बताए । अवार्ड विजेता उद्योग र व्यक्तित्वहरुलाई उपराष्ट्रपति रामसहाय यादवले प्रमाणपत्र प्रदान गरेका थिए । गत वैशाख १७ गते अवार्ड वितरण गरिएको हो ।