खोज

बुटवल, २४ पुस ।

नेपाली भुभाग अतिक्रमणको विरुद्धमा दुई दशकदेखि नवलपरासीको सुस्तामा अभियान चलाउँदै आएका अभियन्ता गोपाल गुरुङ अस्पतालको बेडमा छटपटाईरहेका छन् । ब्रेन हेमरेज पुष्टि भएका गुरुङको उपचारमा आर्थिक अभाव भएको आफन्तहरुको दुःखेसो छ । उनको टाउकोको शल्यक्रिया गरी आईसियुमा उपचार भैरहेको चिकित्सकले बताए । उनको उपचारमा आर्थिक अभाव भएको अभियानका उपाध्यक्ष आदम खाले भने । ‘यसका लागि आर्थिक जुटाउन थालेका छौ’– उनले भने । तीन हप्ता बढी समयदेखि उपचारमा रहेका गुरुङको स्वस्थ्यमा सुधार आउन नसकेको उपचारमा संलग्न चिकित्सकहरुले बताएका छन् ।

दुई हप्ताअघि अचानक घरमा उनी बेहोस भएका थिए । परिवार र सुस्ताबासीहरुले थप उपचारका लागि भैरहवा मेडिकल कलेजमा ल्याएका हुन् । आईसियुमा उपचार भैरहेको उनको स्वस्थ्य अवस्थामा समस्या आईरहेको उनले बताए । अस्पतालको बेडमा रहेका ५९ वर्षीय अभियन्ता गुरुङ सुस्तामा भारतीयबाट अतिक्रमण बढाएपछि ‘सुस्ता बचाउ अभियान’ नारासहित वि.सं. २०६२ सालदेखि आधिकारिक रुपमा अगुवाई गर्दै आएका थिए । अभियानका उपाध्यक्ष आदम खाले एउटा योद्धा अभियन्ता अस्पतालको बेडमा पर्दा आफुहरु दुःखी भएको बताए । ‘हामी उहाँको स्वस्थ्यका कारण धेरै चिन्तित छौ’– उनले भने । राष्ट्रिय धरोहरका रुपमा रहनु भएको गुरुङ निस्वार्थ रुपमा देशका लागि लड्दै आउनु भएको उनले बताए । देशका लागि योगदान दिएका गुरुङको उपचारमा आर्थिक अभाव भएको भन्दै यसमा सरकारबाट सहयोग जरुरी रहेको उनले बताए । आर्थिक अवस्था कमजोर रहेका गुरुङका श्रीमति, एक छोरा र दुई छोरीहरुले रेखदेख गरिरहेका छन् ।

अभियानमार्फत गुरुङले दबाब दिएर सरकारलाई प्राविधिक टोली खटाई सुस्ताको नापनक्सा गर्ने, भोगाधिकार ल्याउने, आवजजावतमा सहजता ल्याउने, झोलुङे पुल निमार्णको काम अघि बढाउने, सौर्य उर्जाको कामलाई जोड दिने जस्ता कामहरु गरेको उनले स्मरण गरे । पुल निर्माण धेरै लामो समयमा वाईरिङ सकेर डोरी जोड्ने कामहरु भैरहेको उनले बताए । सुस्तामा रहेको ४० हजार ९ सय ८० हेक्टर मध्ये १४ हजार हेक्टर जमिन भारतले अतिक्रमण गरेको उनको तर्क छ । यहाँ रहेको १९ हजार ५ सय विवादित जग्गा रहेको छ । नेपालीहरुले ७ हजार हेक्टर जोतभोग गरिरहेको तथ्यांकमा रहेको छ ।

अभियानका कोषाध्यक्ष लैला वेगमले सहयोगका लागि अपिल गरि बैकमा खातामार्फत सहयोग गर्ने बताए । हालसम्म परिवार र गाउबासीहरुबाट थोरैथोरै रकम संकलन गरि उपचार भैरहेको उनले बताईन् ।