खोज

बुटवल,१९ पुस ।  सरकारमा सहभागिताबारे नेकपा एसको बैठक निष्कर्षविहीन बनेको छ ।
प्रचण्ड नेतृत्वको सरकारमा सहभागी हुनुपर्ने अधिकांश नेताको दबाबका कारण बैठकले ठोस निर्णय लिन नसकेको एक नेताले बताएका छन् ।

पोलिटब्युरो बैठकपछि प्रवक्ता जगन्नाथ खतिवडाले सरकारमा सहभागिताबारे थप अध्ययन गर्नुपर्ने भएकाले निर्णय गर्न नसकिएको बताए ।

सोमबार पोलिटब्यूरो बैठकको सुरुवात गर्दै अध्यक्ष माधवकुमार नेपालले अहिलेको अवस्थामा सरकारलाई समर्थन गर्न नसकिने ब्रिफिङ गरेका थिए। नेपालको उक्त धारणा सार्वजनिक भएपछि प्रधानमन्त्री प्रचण्डले सोमबार बेलुका अध्यक्ष नेपाललाई सरकारको विपक्षमा जानेखालको निर्णय नलिइदिन आग्रह गरेका थिए।

प्रचण्डको उक्त आग्रहपछि दुई दिनसम्म चलेको पोलिटब्यूरो बैठकले सरकारलाई समर्थन गर्ने वा नगर्ने विषयमा निर्णय लिने जिम्मा सचिवालयलाई दिएको हो।

अब सरकारको नीति र कार्यक्रम हेरेर समर्थन र विरोध गर्ने निर्णय यो बैठकले सचिवालयलाई दिएको उनले बताए ।
सरकारमा सहभागिताका लागि अहिलेसम्म कुनै औपचारिक प्रस्ताव नआएको पनि दोहोर्‍याए ।

सरकारमा सहभागिताबारे औपचारिक प्रस्ताव नआएकाले त्यसबारेमा अब सचिवालयले निर्णय गर्ने उनले बताए । एमालेसहित ७ दलको समर्थनमा बनेको सरकारमा सहभागी हुनेबारे नेताहरू दुई धारमा बाँडिएका छन् । शनिबार र आइतबारको स्थायी कमिटीको बैठकले सरकारबारे निर्णय गर्न नसकेपछि सोमबार र मंगलबार पोलिटब्युरो बैठक बसेको थियो ।

२५ गते सत्ता गठबन्धनले ल्याउने नीति तथा कार्यक्रम हेरेर विश्वासको मत दिने नदिने निर्भर हुने पार्टी स्रोतले जनाएको छ ।

वैठकमा अध्यक्ष माधव नेपालले पार्टीका नेताहरू रामकुमारी झांक्री र मुकुन्द न्यौपानेलाई लक्षित गर्दै तीतो पोखेका छन् । उनले आफूलाई लागेको कुरा मिडियामा प्रचार गरेर पार्टी नबन्ने बताए ।
उनले सबै कुरा पार्टीमा छलफल गर्न नेताहरूलाई निर्देशन दिएका छन् । पार्टी वरिष्ठ नेता मुकुन्द न्यौपाने र पार्टी सचिव रामकुमारी झाँक्रीले पार्टीविरुद्ध गतिविधि गरेको बैठकमा कुरा उठेपछि अध्यक्ष नेपालले यस्तो निर्देशन दिएका हुन् ।
उनीहरूमाथि एमाले र माओवादीको पैरवी गरेको र आफ्नै पार्टी अध्यक्षको बद्ख्वाइँ गरेको आरोप छ ।