खोज

बुटवल,३ जेठ । तिलोत्तमाको मणिग्रामस्थित क्रिमसन अस्पतालले विभिन्न कार्यक्रम गरी १२ औं वार्षिकोत्सव मनाएको छ । वार्षिकोत्सवका अवसरमा एक दिन ओपीडीका विरामीको निःशुल्क चेकजांच, रक्तदान र १० वर्ष सेवा गरेका डाक्टर, स्वास्थ्यकर्मी र कर्मचारी गरी ३० जनालाई सम्मान गरेको हो ।
कर्मचारी सम्मान कार्यक्रममा अस्पतालका अध्यक्ष दुर्गाप्रसाद पाण्डेय, अस्पतालका सञ्चालक सुरज भट्टराई लगायतले निकट भविष्यमै अस्पतालमा थप सय बेड थपेर कुल २ सय शैयाको अस्पताल बनाउने घोषणा गरे । अध्यक्ष पाण्डेयले अस्पतालको आफ्नै २ बिघा क्षेत्रफल जग्गा भएकाले थप सय बेड थप्ने तयारीमा रहेको बताए । डाक्टर र कर्मचारीले विरामीलाई मुस्कानसहितको सेवा दिनुपर्ने आग्रह गर्दै अध्यक्ष पाण्डेयले गुणस्तरीय सेवाले नै अस्पताल सफल हुने स्पष्ट पारे ।
अस्पतालका सञ्चालक सुरज भट्टराईले एक डेढ वर्षभित्रमा सय बेड थपेर अस्पताललाई विशेषज्ञ अस्पतालका रुपमा विकास गर्ने योजना रहेको बताए । चिकित्सक र कर्मचारी नै अस्पतालका मेरुदण्ड भएकाले मानवीय सेवा भावले उपचार दिएर बेग्लै पहिचान बनाउनुपर्ने बताए ।
सो अवसरमा अस्पतालका निर्देशक डा. शेखरप्रसाद पोखरेल,सम्मानित कर्मचारीका तर्फबाट जमुना भट्टराई लगायतले बोल्दै गुणस्तरीय उपचार सेवा मार्फत अस्पताललाई सबैको रोजाईको थलो बनाउनुपर्नेमा जोड दिएका थिए ।