खोज

बुटवल, १७ चैत ।

सिद्धार्थ उद्योग वाणिज्य संघ, रुपन्देहीमा मनोनित सदस्य प्रक्रियाप्रति असन्तुष्टी जनाउँदै जिल्ला प्रशासन कार्यालयमा उजुरी परेको छ ।

संघले कार्यसमिति सदस्यमा मनोनीत गरेका कैलाश गुप्ताको विधान अनुुसार योग्यता नपुगेको भन्दै उक्त निर्णय खारेजीको माग गर्दै ह्याप्पी भिजिट टुर्स एण्ड ट्राभल्स प्रालिका उमाशंकर मिश्रले जिल्ला प्रशासनमा उजुरी दिएका हुन् ।

संघको विधानमा २ आर्थिक वर्ष पूरा गरेको साधारण सदस्यले मात्र कार्यसमितिको सदस्य हुन पाउने व्यवस्था रहेको भन्दै उजुरीमा संघले मनोनीत गरेका गुप्ताको विधान बमोजिमको योग्यता नपुगेको उल्लेख छ । संघका अध्यक्षले गरेको गैरकानुनी प्रावधान अनुसारको सदस्य तत्काल हटाई विधानसम्मत व्यक्ति वा फर्मलाई मनोनीत गर्न माग गरिएको छ ।

साथै उजुरीमा निर्वाचनमा सचिव पदमा उम्मेददार भई पराजित भएका धर्मविर शर्मालाई नैतीकता र इमान्दारिताको ख्याल नगरी बाणिज्य सदस्यमा मनोनीत गरिएको भन्दै उक्त पदबाट कारवाहीको माग गरिएको छ ।

उजुरीमा उद्योग बाणिज्य महासंघ काठमाडौं, गृहमन्त्रालय काठमाडौं, समाज कल्याण परिषद काठमाडौं, सिद्धार्थ उद्योग बाणिज्य संघ रुपन्देही र उद्योग बाणिज्य महासंघ लुम्बिनी प्रदेशलाई बोधार्थ दिइएको छ ।

यस सम्बन्धमा सिद्धार्थ उद्योग बाणिज्य संघका अध्यक्ष ठाकुर श्रेष्ठले सदस्य मनोनीत विधान विपरित नभएको बताए । सदस्य भएको दुई आर्थिक वर्ष पुगेको हुनुपर्ने भन्ने प्रावधान चुनावमा उठ्नका लागि भएको भन्दै उनले तर मनोनीत हुनका लागि भने साधारण सदस्य भए मात्र पुग्ने बताए । श्रेष्ठले व्यक्तिगत कुण्ठाका कारण उजुरी दिइएको बताए ।