खोज

अर्घाखाँची, ६ साउन।

अर्घाखाँचीको पाणिनी गाउँपालिकाका तुल्सीराम पोख्रेलले डिभिजन वन कार्यालयद्धारा बाँदर र बँदेल हेरालुका लागि आवेदन आह्वान गरेको जानकारी पाएपछि निवेदन दिएका थिए। योग्यता पुगेको आधारमा उनी उक्त जिम्मेवारीका लागि छनोट भए र सोमबार पाणिनीको पणेना क्षेत्रमा नियुक्ति पनि पाए।

पोख्रेलजस्तै गरी जिल्लाका विभिन्न स्थानमा २० जनालाई बाँदर तथा बँदेल हेरालुका रूपमा डिभिजन वन कार्यालयले नियुक्त गरेको हो । आईतबार नामावली सार्वजनिक गरेपछि सोमबार औपचारिक सम्झौता तथा अभिमुखीकरण कार्यक्रमसमेत सम्पन्न गरिएको थियो।

वन्यजन्तुजन्य क्षति न्यूनीकरण, कृषकको खेती सुरक्षित गर्ने र वन्यजन्तुसँगको सहअस्तित्व प्रवर्द्धन गर्ने उद्देश्यले हेरालु नियुक्त गरिएको डिभिजन वन कार्यालयका सहायक डिभिजन वन अधिकृत केशव खड्काले जानकारी दिए ।

यस कार्यमा डिभिजन वन कार्यालयको संयोजनमा स्थानीय सामुदायिक वन समूहहरू, विशेषतः पर्याप्त आर्थिक स्रोतसाधन भएका सक्रिय समूहहरूको सहकार्य रहने छ ।

हाल अर्घाखाँची जिल्लामा बाँदर र बँदेलको आतङ्कले कृषकहरू चिन्तित छन्। त्यसकारण यसको नियन्त्रणका लागि स्थानीय सरकारले तारजाली वितरणदेखि हेरालु राख्नेसम्मका विभिन्न प्रयासहरू थालेको हो ।

यसअघि पनि सामुदायिक वनमा बाँदर नियन्त्रण गर्ने उद्देश्यले फलफूलका बिरुवाहरू रोपिएको थियो। वनमा फलफूल उपलब्ध भएपछि बाँदर गाउँ पस्नुभन्दा वनमै बस्ने र खेतीबाली सुरक्षित हुने अपेक्षा गरिएको छ। यसले वन्यजन्तु संरक्षणसँगै आम्दानीको अवसरसमेत सिर्जना गर्ने वन कार्यालयको विश्वास छ।