खोज

काठमाडौं, २ जेठ ।
बिहीबार देशका विभिन्न स्थानमा अचानक विद्युत् आपूर्ति अवरुद्ध भएपछि नेपाल विद्युत् प्राधिकरणले घटनाबारे स्पष्ट पारेको छ। प्राधिकरणका कार्यकारी निर्देशक हितेन्द्र देव शाक्यले यस्ता समस्यालाई अत्याधिक नठान्न आग्रह गर्दै प्रसारण प्रणालीलाई उत्पादनको गति अनुसार सुधार गर्नुपर्ने आवश्यकता औंल्याए।

शुक्रबार आयोजित पत्रकार सम्मेलनमा शाक्यले ढल्केबर–वसन्तपुर र ढल्केबर–नवलपुर ४०० केभी लाइनमा रुखका हाँगाहरूले ठक्कर दिँदा प्रणालीमा समस्या आएको जानकारी दिए। तीव्र हावाहुरीका कारण चक्रवातजस्तो स्थिति सिर्जना भएको र एकैपटक धेरै ठाउँमा लाइन अवरुद्ध भएपछि सिस्टम अस्थिर बनेको उनले बताए।

“हिजो ६:३८ मा दुईवटा लाइन एकसाथ बन्द हुँदा सम्पूर्ण प्रणाली प्रभावित भयो,” शाक्यले भने, “त्योबेलाको अवस्था विश्लेषण गरेर भारतसँग समन्वय गरी समस्या समाधान गरियो।” उनका अनुसार समस्या पहिचानका लागि दुईवटा कोड भारत पठाएर ट्रान्समिसन लाइन परीक्षण गरिएको थियो, जसले केही समय लागेको हो।

शाक्यले प्रणाली सुधारका लागि तीन तहको योजना (तत्कालीन, एक वर्षभित्र र दीर्घकालीन) तय गरिएको र सम्बद्ध विभागहरूसँग छलफल भइसकेको जानकारी दिए। “विद्युत् उत्पादनमा वृद्धि भए पनि प्रसारण प्रणाली त्यसको तुलनामा कमजोर भयो भने यस्ता समस्या आउन सक्छन्,” उनले स्पष्ट पारे, “तर अब प्राधिकरण अझ चुस्त हुँदै अघि बढ्छ। चिन्ता लिनुपर्ने अवस्था छैन।”