खोज

काठमाडौं ।

प्रधानमन्त्री केपी शर्मा ओलीसँग दक्षिण कोरियाको ‘कोरिया रेलरोड कर्पोरेसन’ का अध्यक्ष एवं प्रमुख कार्यकारी अधिकृत हान मुन ही नेतृत्वको प्रतिनिधिमण्डलले बुधबार भेटवार्ता गरेको छ। प्रधानमन्त्री निवास, बालुवाटारमा सम्पन्न उक्त भेटमा कोरियाली पक्षले नेपालमा रेल्वे निर्माणका क्षेत्रमा सहकार्य गर्ने गहिरो रुचि व्यक्त गरेको हो। १२६ वर्ष पुरानो अनुभव बोकेकोले नेपालमा रेल पूर्वाधार निर्माण तथा प्रविधि स्थानान्तरणमा सहयोग गर्नसक्ने धारणा राखेको छ।

भेटका क्रममा ‘स्काइ वाक’ कम्पनीले तयार पारेको चतराधामदेखि चौरीखर्कसम्म प्रस्तावित ‘एभरेस्ट रेलवे प्रोजेक्ट’ को एनिमेसन भिडियो पनि प्रस्तुत गरिएको थियो। भौतिक पूर्वाधार तथा यातायातमन्त्री देवेन्द्र दाहाल र लगानी बोर्डका प्रमुख कार्यकारी अधिकृत सुशील ज्ञवालीसमेत सहभागी छलफलमा प्रधानमन्त्री ओलीले जनकपुरमा रेल सेवा सञ्चालन भइसकेको र अन्य क्षेत्रमा पनि सम्भाव्यता अध्ययन भइरहेको बताए। उनले कोरियाली सहकार्यलाई सकारात्मक अवसरका रूपमा लिने धारणा राखे।

कोरियन प्रतिनिधिमण्डलले यसअघि भौतिक पूर्वाधार मन्त्रालय र लगानी बोर्डसँग पनि छुट्टाछुट्टै छलफल गरी संयुक्त कार्य समूह गठन गरी थप अध्ययन अगाडि बढाउने समझदारी गरिसकेको जानकारी दिएको छ।