खोज

काठमाडौं ।

‘संवैधानिक राजसंस्था र सनातन हिन्दु अधिराज्य सहित बहुदलीय प्रजातन्त्र पुनर्स्थापनाका लागि संयुक्त जनआन्दोलन समिति’ले आगामी जेठ १५ गतेदेखि सुरु हुने राजधानी केन्द्रित आन्दोलनका लागि उपत्यकाबाहिरबाट सहभागीहरू ल्याउने तयारी गरेको छ। आइतबार समिति संयोजक नवराज सुवेदीको अध्यक्षतामा बसेको बैठकले काठमाडौँ बाहिरका जनतालाई आन्दोलनमा सहभागी हुन काठमाडौं आउन आह्वान गर्ने निर्णय गरेको हो।

साथै, काठमाडौं उपत्यकाका तीनै जिल्लाका जनता, सबै वर्ग, पेसा र समुदायलाई पनि सक्रिय सहभागिताका लागि आग्रह गरिएको छ। आन्दोलनलाई सफल बनाउन आम नेपालीहरूसँग आर्थिक सहयोग (चन्दा) पनि माग गरिएको छ। संयोजक सुवेदीले राष्ट्रवादी शक्तिहरू एकै ठाउँमा उभिएको उल्लेख गर्दै वातावरण अनुकूल भएको र अब आन्दोलन सफल पार्न सबै मिलेर लाग्नुपर्ने धारणा राखे।

बैठकले आन्दोलन तयारीस्वरूप विभिन्न कार्यक्रमहरू घोषणा गरेको छ। वैशाख २८ गते राप्रपाको केन्द्रीय कार्यालयमा मोर्चासँग आबद्ध दल, संघसंस्था तथा वर्गीय संगठनका नेताहरूको संयुक्त बैठक हुनेछ। त्यस्तै, जेठ ६ गते संवैधानिक राजसंस्था र सनातन हिन्दु अधिराज्यप्रति आस्था राख्ने व्यक्तिहरूको भेला आयोजना गरिनेछ।

आन्दोलनको प्रचार र जनजागरणका लागि जेठ ८ देखि ११ गतेसम्म उपत्यका जनजागरण यात्रा सञ्चालन गरिने भएको छ, जसको शुभारम्भ साँखुबाट हुने र समापन चाँगुनारायणमा गरिने तय गरिएको छ। यस यात्रा अन्तर्गत काठमाडौं उपत्यकाका सबै १५ पालिकामा कोणसभाहरू गरिनेछ।

जेठ १३ गते वृहत् युवा स्वयंसेवक भेला गरिनेछ भने उपत्यकाबाहिरका जनताको व्यापक सहभागिता सुनिश्चित गर्न आवश्यक तयारी अघि बढाइनेछ। सुवेदीले आन्दोलन शान्तिपूर्ण हुने दाबी गर्दै राष्ट्रिय मानव अधिकार आयोग र अन्तर्राष्ट्रिय मानव अधिकार संस्थाहरूलाई अनुगमन गर्न आग्रह गरिएको जानकारी दिएका छन्। साथै, तीनकुने घटनामा पक्राउ परेकाहरूको तत्काल रिहाइको माग पनि बैठकले गरेको छ।