खोज

दाङ, २४ बैशाख ।

नेपाल वातावरण पत्रकार समूहको आयोजना, अर्थ जोर्नालिजम नेटवर्कको साझेदार र युरोपियन युनियनको आर्थिक सहयोगमा हरित आर्थिक वृद्धि र प्राकृतिक स्रोत व्यवस्थापन प्रदेश स्तर बहु सरोकारवाला सम्बाद कार्यक्रम दाङको भालुवाङमा भएको छ ।

कार्यक्रममा लुम्बिनी प्रदेश वन तथा वातावरण मन्त्री देवकरण प्रसाद कलवारले जलबायु परिवर्तनका कारण देशमा धेरै असर भएको बताए । “पानीका मुहान, खोला नाला सुकेका छन् । सिचाइका लागि पोखरीको व्यवस्थापन गर्नुपर्छ । सिमसार क्षेत्र संरक्षण गर्नुपर्छ”– उनले भने–“पानीको संरक्षणले मात्र हरित ब्यवस्थापन हुने गर्छ । प्रत्येक खोलामा तटबन्ध गर्ने र पानीलाई प्राथमिकता राखेर काम गर्नुपर्छ ।”

लुम्बिनी प्रदेश सभा सदस्य खड्क बस्नेतले योजनाबद्ध तरिकाले काम गर्नुपर्ने बताए । प्राकृतिक स्रोतलाई प्रयोग गर्दा सरकारले बनाएका नीतिनियमलाइ पालना गर्नुपर्ने उनको धारणा छ । जल, जमिन र जंगलको प्रयोग गर्दा त्यसको सकारात्मक र नकारात्मक पक्षमा ध्यान दिनुपर्ने उनले बताए ।

योजना आयोगका उपाध्यक्ष डिल्लीराज अर्यालले संघीय, प्रदेश र स्थानीय तहमा बनेका ऐन संग तालमेल नभएका कारण काम गर्न समस्या भएको बताए । लुम्बिनी प्रदेश वन मन्त्रालयका निर्मल चौधरीले वातावरण कार्यमा संचालकहरुले आइइ प्रतिबेदन अनुसार काम गरेको नपाइएको बताए ।

डिभिजन वन कार्यालय प्रमुख महेन्द्रराज वाग्लेले वन प्राकृतिक स्रोत भएकाले यसको संरक्षणमा चुनौती रहेकोे बताए । लुम्बिनी प्रदेशमा कुल क्षेत्रफलको ४४ प्रतिशत भाग वनले ओगटेका कारण नेपाल सरकारले दीगो वन व्यवस्थापनमा वनको उत्पादन र उत्पादकत्व बढाउनुपर्ने उनले बताए ।

कार्यक्रममा उर्जा महाशाखा प्रमुख महेश पौडेल, कुलपानी सामुदायिक उपभोक्ता समितिका अध्यक्ष नवराज शर्मा, ब्यवसायी चित्रबहादुर महतरा क्षेत्री, सामुदायिक वन उपभोक्ता महासंघका अध्यक्ष हरिप्रसाद भुसाल, तुलसीपुर उपमहानगरपालिकाका उपप्रमुख स्यानी चौधरी, लमही नगरपालिकाका उपप्रमुख लक्ष्मी योगी, राजपुर गाउँपलिका उपाध्यक्ष धनपती यादव, राप्ती गाउँपालिका वडा नं. ४ अध्यक्ष विरबहादुर चौधरी, वन्यजन्तु संरक्षण अभियान कर्ता चिरञ्जीवी खनाल, विजय भट्टराई, मनोज न्यौपाने, पत्रकार लिला शाह लगायतले धारणा राखेका थिए ।