खोज

काठमाडौँ ।

चौधरी ग्रुपका अध्यक्ष तथा सांसद विनोद चौधरीले सिङ्गापुरमा आयोजित फिलान्थ्रपी एसिया एलायन्स–२०२५ सम्मेलनको अवसरमा विश्वविख्यात परोपकारी व्यक्तित्व तथा माइक्रोसफ्ट का सह–संस्थापक बिल गेट्ससँग विशेष भेटवार्ता गरेका छन्।

मंगलबार सम्पन्न उक्त भेटमा नेपालको स्वास्थ्य सेवा प्रणाली र रोजगारी क्षेत्रका प्रमुख चुनौतीहरूबारे गम्भीर छलफल भएको चौधरीले सामाजिक सञ्जालमार्फत जानकारी दिएका छन्। उनले विशेषगरी २०७२ को भूकम्प, कोभिड–१९ महामारी र बालपोषण जस्ता सामाजिक चुनौतीमा गेट्स फाउन्डेसनको साथबारे कृतज्ञता व्यक्त गरे।

दुवैबीच भएको छलफलमा गेट्स फाउन्डेसनले अन्य देशहरूमा सञ्चालन गरेका प्रभावशाली कार्यक्रमहरू नेपालमा पनि सञ्चालन र सन्दर्भअनुसार विस्तार गर्नेबारे सहकार्यका सम्भावनामा छलफल भएको थियो।

चौधरी फाउन्डेसनले विगतमा भूकम्प राहतदेखि कोभिड महामारीसम्म विभिन्न सामाजिक कार्य गर्दै आएको छ, जसअन्तर्गत भूकम्पपछिका अस्थायी आवास निर्माण, विद्यालय पुनर्निर्माण, स्वास्थ्य सामग्री वितरण, र अक्सिजन प्लान्ट स्थापना जस्ता कार्यक्रम प्रभावकारी रूपमा सञ्चालन गरिएका थिए।

बिल गेट्स, जसले बिल एण्ड मेलिन्डा गेट्स फाउन्डेसनमार्फत स्वास्थ्य, शिक्षा र प्रविधिमा विश्वव्यापी योगदान दिँदै आएका छन्, उक्त सम्मेलनका प्रमुख वक्तामध्ये एक थिए।

सिङ्गापुरमा सम्पन्न सम्मेलनमा विश्वका नीति निर्माता, परोपकारी संस्था प्रमुख तथा अन्तर्राष्ट्रिय व्यक्तित्वहरूको उपस्थिति थियो। सम्मेलनले एसियाली क्षेत्रका सामाजिक संस्थाहरूबिच सहकार्य र दिगो विकास प्रवर्द्धन गर्ने उद्देश्य राखेको छ।

नेपालका तर्फबाट विनोद चौधरीको सहभागिताले नेपालका सामाजिक र विकासका मुद्दा अन्तर्राष्ट्रिय मञ्चमा प्रस्तुत हुने अवसर प्राप्त गरेको छ।