खोज

लमही, २३ बैशाख ।
लुम्बिनी प्रदेश सरकारका मुख्यमन्त्री चेतनारायण आचार्य र सभामुख बिष्टबीच सोमबार शिष्टाचार भेटघाट तथा छलफल भएको छ । राजधानी देउखुरीस्थित मुख्यमन्त्री तथा मन्त्रिपरिषद्को कार्यालयमा भएको छलफलमा संघीयता बलियो बनाउन प्रदेशस्तरीय समन्वय, कानुन निर्माण र असल अभ्यास आदानप्रदानको आवश्यकता औंल्याइएको थियो ।
मुख्यमन्त्री आचार्यले प्रदेश स्थापना भएको आठ वर्षमा सामाजिक सुधार, पूर्वाधार विकास र मानव पुँजी निर्माणका क्षेत्रमा उल्लेखनीय उपलब्धिहरू भएको बताउँदै अन्तरप्रदेश समन्वय संघीयता सुदृढीकरणमा टेवा पुग्ने बताए । सभामुख बिष्टले लुम्बिनी प्रदेशको कानुन निर्माण र प्रशासनिक केन्द्र निर्माणका अनुभवहरू कोशी प्रदेशका लागि सिकाइ हुने बताए ।
संघीयता सुदृढीकरण र प्रदेशबीच आपसी सहकार्यलाई प्रवद्र्धन गर्ने उद्देश्यका साथ लुम्बिनी र कोशी प्रदेशबीच अन्तरप्रदेश सभा अनुभव आदानप्रदान कार्यक्रम सम्पन्न भएको छ ।

त्यसैगरि सभामुखबीच पनि भेटवार्ता भएको छ । लुम्बिनी प्रदेश सभा सचिवालयमा आयोजित कार्यक्रममा लुम्बिनी प्रदेशका सभामुख तुलाराम घर्ती मगर, उपसभामुख मेनुका खाड केसी, सामाजिक विकास समितिका सभापति यमबहादुर नेपाली, नेकपा माओवादी केन्द्र संसदीय दलका प्रमुख सचेतक इन्द्र जित थारु र कांग्रेस संसदीय दलकी पूर्व सचेतक निमा गिरीज्यूको उपस्थितिमा प्रतिनिधिमण्डललाई स्वागत गरियको थियो । कार्यक्रममा कोशी प्रदेशकी उपसभामुख सिर्जना दनुवार, जसपा नेपालकी नेतृ निर्मला लिम्बु, नेकपा माओवादी केन्द्रकी गीता तिमिल्सिना, नेकपा एसकी बिधा चाम्लिङ राई, कांग्रेसकी शोभा चेम्जोङ, राप्रपाका गोपाल बहादुर विश्वकर्मा लगायत सहभागी थिए । कोशी प्रदेश सभा सचिवालयका कार्यबाहक सचिव गौतमराज अमात्य पनि टोलीमा सहभागी थिए ।