खोज

लमही, १८ बैशाख ।
नेपाल रेडक्रस सोसाईटी उपशाखा गढवाले पछिल्लो समयमा नेपालका तराई क्षेत्रहरूमा फैलिन थालेको डेंंगु र दादुरा महामारीबाट नागरिकहरूलाई बचाउन सतर्कता अभियान नै सञ्चालन गरिरहेको छ । गढवा गाउँपालिका वडा नम्बर ६ को आर्थीक प्राबिधीक सहयोगमा उपशाखा गढवाले बिभिन्न गाउँवस्तिहरूमा अभियान नै थालनी गरेको सभापती उमाकान्त पन्तले जानकारी दिए । । यसअघि रेडक्रसको आयोजना र गढवा गाउँपालिका ६ नम्बर वडा कार्यालयको संयोजनमा गढवाको कुमाल टोलमा स्वास्थ्य कर्मिद्धारा सचेतना कार्यक्रम गरिएको थियो भने बुधवार गढवा–६ को बालाखुटी र हाँसीपुर टोलमा कार्यक्रमको आयोजना गरि डेंगो र दादुरा महामारिबाट बच्न पूर्व सतर्कता अपनाउन आम नागरिकहरूलाई आव्हान गरिएको छ ।

एक बर्ष मुनीका वालवालीका, गर्भवती तथा सुत्केरी महिला, बृद्धबृद्धा, दिर्घरोगी, रगत जम्ने समस्या भएका मानिसहरू र मोटोपना भएका मानिसहरूमा डेंगो रोगको संक्रमण तुरुन्त हुनसक्ने कार्यक्रममा जानकारी गराइएको छ । डेंगोका किटाणुले आक्रमण गरेमा ज्वरो आउने, टाउको र आँखाका गेडीहरू दुख्ने, हातखुट्टा र शरिर नराम्रोसंग दुख्ने, खाना खान मन नलाग्ने र वान्ता हुने जस्ता लक्षण हुने कार्यक्रममा स्वास्थ्यकर्मीद्वारा जानकारी गराइएको हो । सफा पानीमा बस्ने पानीमै फूलपार्ने लामखुट्टेले मानिसलाई टोकेमा डेंगु रोग लाग्ने भन्दै गाउँ, घर तथा बजारहरूमा पानी जम्ने खालका कुनैपनि भाँडाहरू, टायरहरू, गमलाहरू र खाल्डाहरू पानी जम्न नदिने कुरामा सन्देश प्रबाह गरिएको थियो । लामखुट्टेको टोकाईबाट बच्न घर वरीपरी पानी जम्न नदिने र झुल प्रयोग गरेर मात्र सुत्न कार्यक्रमका सहभागीहरूलाई आग्रह गरिएको थियो ।

कार्यक्रममा डेंगु रोग र यसका लक्ष्यणहरू, सावधानी अपनाउनु पर्ने बिधिहरू र यसले मानव शरिरमा पार्ने असरहरूका बारेमा तथा दादुरा रोगबाट बच्ने उपायहरूका बारेमा समेत स्वास्थ्यकर्मी सुर्य नारायण यादवले प्रशिक्षण दिएका थिए । गढवा गाउँपालिकाको ६ नम्बर वडामा सबैभन्दा बढी डेंगोको संक्रमण देखिएको स्वास्थ्यचौकी गढवाले जनाएको छ । जस अनुसार गत आर्थिक बर्षमा २४१ जनामा डेंगो देखिएकोमा १० जना गंभिर बिरामी भएर बाँच्न सफल भएको र यसबर्षको हालसम्म ३७ महिला र ३० पुरुष गरी ६७ जनमा डैंगो संक्रमण देखिएको कार्यक्रममा जानकारी गराइएको थियो ।