खोज

लमही, १८ बैशाख ।
लुम्बिनी प्रदेशका मुख्यमन्त्री चेतनारायण आचार्यले आगामी आर्थिक वर्षको नीति तथा कार्यक्रम तथा बजेट यथार्थपरक हुने बताएका छन् । देउखुरीस्थित मुख्यमन्त्री तथा मन्त्रिपरिषद्को कार्यालयमा सरकारमा सहभागी दलका प्रमुखहरूसँग आयोजित छलफल कार्यक्रममा मुख्यमन्त्री आचार्यले नीति तथा कार्यक्रम जनअपेक्षासँग मेल खानेगरी तयार पारिने स्पष्ट पारे । “सरकारले सन्देश दिनेगरी र आशा जगाउनेगरी नीति तथा कार्यक्रम तथा बजेटको तयारी गर्दैछ,” मुख्यमन्त्री आचार्यले भने, “तपाईंहरूको सुझावलाई आधार मानेर समावेश गर्नेछौं । आम्दानी अनुसार बजेटको आकार ३१ देखि ३२ अर्बको हाराहारीमा रहनेछ ।”

मुख्यमन्त्रीले घाटा बजेट नबनाउने उल्लेख गर्दै, थोरै लगानीबाट प्रतिफल दिने योजनालाई प्राथमिकतामा राख्ने धारणा राखे । उनले नीति तथा कार्यक्रममै आधारित भएर वार्षिक बजेट निर्माण गरिने र बाहिरका कार्यक्रम नसमेटिने जानकारी दिए । छलफलमा सहभागी नेपाली कांग्रेस संसदीय दलका नेता तथा पूर्व मुख्यमन्त्री डिल्लीबहादुर चौधरीले अनुसन्धानमा आधारित नीति तथा कार्यक्रम र बजेट बनाउन सुझाव दिए । “थोरै बजेटले धेरै काम हुनेगरी बजेट ल्याउनुपर्छ,” उनले भने, “राजस्व बढाउने, सम्पन्न हुने योजनालाई प्राथमिकतामा राख्न आवश्यक छ ।”

कांग्रेस लुम्बिनी प्रदेश अध्यक्ष अमरसिंह पुनले प्रदेश सरकारलाई संविधान प्रदत्त अधिकारको प्रभावकारी कार्यान्वयनमा जोड दिए । “सुशासनलाई प्राथमिकतामा राखेर नीति तथा कार्यक्रम ल्याउनुपर्छ,” उनले भने, “पर्यटन विकासमा लुम्बिनीलाई जोड्न सकिन्छ ।” नेकपा एमाले लुम्बिनी प्रदेश अध्यक्ष राधाकृष्ण कँडेलले भ्रष्टाचार नियन्त्रण र उत्पादनशील क्षेत्रलाई प्राथमिकता दिनुपर्नेमा जोड दिए । “भौतिक पूर्वाधार मात्र होइन, कृषि, शिक्षा, स्वास्थ्य, उद्यम विकासमा बजेट केन्द्रित हुनुपर्छ,” उनले बताए ।

छलफलमा एमाले संसदीय दलका उपनेता भोजप्रसाद श्रेष्ठ, प्रमुख सचेतक तुलसी चौधरी, सचिव लक्ष्मण आचार्यलगायतले समावेशी र स्रोत परिचालनमैत्री बजेटको सुझाव दिए ।बैठकमा मन्त्री, दलका प्रतिनिधि, योजना आयोगका पदाधिकारी तथा सचिवहरूको सहभागिता थियो । छलफलबाट प्राप्त सुझावलाई नीति तथा कार्यक्रम र बजेट निर्माणको आधार बनाइने जनाइएको छ ।