खोज

बुटवल, ११ वैशाख ।

भारतको जम्मु कश्मिरको पहलगाममा भएको आतंकवादी हमलामा मारिएका बुटवलका सुदीप न्यौपानेको आज त्रिवेणी घाटमा अन्त्येष्टि गरिएको छ। मंगलबारको घटनामा ज्यान गुमाएका सुदीपको पार्थिव शरीर भारत हुँदै आज बिहान बुटवल ल्याइएको थियो।

बुटवल–११, कालिकानगर मनकामना पथका २५ वर्षीय सुदीपलाई उनका काका कपिलदेव न्यौपाने (कृष्ण) ले दागबत्ती दिएका छन्। बुबा–आमाबीच सम्बन्ध विच्छेद भएकाले बुबाको सट्टा काकाबाट अन्त्येष्टि गरिएको हो।

सुदीपको शव श्रीनगरबाट दिल्ली, दिल्लीबाट लखनउ हवाईमार्ग हुँदै सुनौली नाका पार गरेर एम्बुलेन्समार्फत बुटवल ल्याइएको थियो। पार्थिव शरीरलाई केहीबेर घरमा राखिएपछि अन्त्येष्टिका लागि त्रिवेणी घाट लगिएको थियो।

सामाजिक रूपमा सक्रिय, स्वदेशमै केही गरेर देखाउने अठोट लिएका सुदीप हाल पब्लिक हेल्थ अध्ययन गर्दै थिए। अघिल्लो पढाइमा उनी हेल्थ एसिस्टेन्ट थिए। उनको मृत्युले बुटवल शोकमा डुबेको छ। छिमेकीहरूका अनुसार, सुदीप निकै मिलनसार र आशावादी युवा थिए।

मंगलबार आमासहित बहिनी र ज्वाइँसँग कश्मिर घुम्न गएका सुदीप आतंकवादी आक्रमणको शिकार बने। उनका परिवारका अन्य सदस्य भने भाग्यवश सुरक्षित रहेका छन्। बुबा ध्रुव न्यौपाने शिक्षण पेशामा आबद्ध छन् र हाल शिक्षक आन्दोलनका क्रममा काठमाडौंमा रहेका बेला छोराको मृत्युको खबर पाएका थिए।

एक उत्साही युवाको यति दर्दनाक निधनले समाजमा शोक, आक्रोश र असहजता फैलिएको छ। सुदीपको निधनसँगै, बुटवलको मनकामना पथ सिंगो शहरजस्तै मौन र भावविह्वल देखिएको छ।