खोज

काठमाडौं ।

सरकारले आगामी आर्थिक वर्षका लागि नीति तथा कार्यक्रम बैशाख १९ गते संसदमा प्रस्तुत गर्ने भएको छ। सिंहदरबारमा बुधबार सभामुख देवराज घिमिरे, प्रमुख सचेतक तथा दलका प्रतिनिधिहरूबीच भएको छलफलपछि प्रतिनिधिसभाको क्यालेन्डर मस्यौदा तयार गरिएको हो। छलफलपछि एमालेका प्रमुख सचेतक महेश बर्तौलाले सरकारले बैशाख १९ गते नीति तथा कार्यक्रम ल्याउने तय भएको जानकारी दिएका छन्।

बैशाख १२ गते बस्ने प्रतिनिधिसभाको पहिलो बैठकमा शीर्ष नेताहरूले सम्बोधन गर्ने कार्यक्रम तय गरिएको छ। सो बैठकमा संसदको कार्यतालिकासमेत कार्यव्यवस्था परामर्श समितिमा पेश गरिनेछ। छलफलमा विद्यालय शिक्षा विधेयकलाई प्राथमिकताका साथ अघि बढाउने सहमति भएको बताइएको छ। बर्तौलाका अनुसार सो विधेयक सदनमा प्रस्तुत भएपछि तत्कालै पारित गर्ने तयारी गरिएको छ। उपसमितिले बैशाख २३ गतेभित्र प्रतिवेदन बुझाउने प्रतिबद्धता जनाएको अवस्थामा विधेयकलाई प्राथमिकतामा राखिनेछ।

सभामुख घिमिरेले पूर्वबजेट छलफल, नीति तथा कार्यक्रम, बजेट र विद्यालय शिक्षा विधेयकका कारण संसद नियमित सञ्चालन गर्नुपर्ने अवस्था आएको बताएका छन्। त्यसैले शनिबार र सार्वजनिक बिदाबाहेक अन्य सबै दिन संसद बैठक सञ्चालन गरिने प्रस्ताव गरिएको छ, जसलाई छलफलमा सहमति दिइएको छ। यसै अनुरूपको क्यालेन्डर कार्यव्यवस्था परामर्श समितिमा प्रस्तुत गरिने कांग्रेसका प्रमुख सचेतक श्याम घिमिरेले जानकारी दिएका छन्।