खोज

रुपन्देही ।

पत्रकार राधेश्याम बिश्वकर्मामाथी अभद्र व्यवहार गर्ने आरोपितलाई कारबाहीको माग गर्दै मंगलबार नेपाल पत्रकार महासंघ रूपन्देही र लुम्बिनी प्रेस क्लबले प्रमुख जिल्ला अधिकारीलाई ज्ञापन पत्र बुझाएका छन् ।

प्रहरीले आरोपित दिपेश यादव पक्राउ परेका छन् भन्नू र अर्को दिन उनी भाग्नुले प्रहरीकै संरक्षणमा तस्कर रहेको कुरामा थप बल पुगेको पत्रकारले आरोप लगाएका छन् । नेपाल पत्रकार महासंघका केन्द्रिय सदस्य रामराज पोख्रेलले आरोपितलाई पक्राउ गरि कारबाही नगरे देशै भरी आन्दोलन गर्ने चेतावनी दिएका छन् ।

नेपाल पत्रकार महासंघ रूपन्देहीका अध्यक्ष दिनेश पान्डेले प्रहरीकै अंगाडि तस्करले भिडियो डिलिड गर्न लगाउनु प्रहरीसंग नागरिक सुरक्षित छैनन् भन्ने सन्देश जाने बताउंदै आरोपितलाई पक्राउ गरि कारबाहीको माग गरे ।

लुम्बिनी प्रेस क्लबका अध्यक्ष कमल रायमाझीले पत्रकारले युद्धमा समेत स्वतन्त्ररुपमा समाचार बनाउने तर सडकमै भएको तस्करीको भिडियो खिच्दा असुरक्षित हुनु स्वतन्त्र पत्रकारीताको हनन भएको बताए ।

रूपन्देहीका प्रमुख जिल्ला अधिकारी बासुदेव घिमिरेले पत्रकारलाई सार्वजनिक स्थानमा तस्बिर भिडियो खिच्न पाउनु पूर्ण अधिकार भएको बताउंदै दोषी उपर छानबिन गरि कारबाहीको दायरामा ल्याउने आश्वासन दिएका छन् ।

सोमबार अन्नपूर्ण नेटवर्क प्रालिका पत्रकार राधेश्याम बिश्वकर्मा मर्चवार कृषि मन्त्रीको कार्यक्रममा जाने क्रममा तस्करीजन्य सामान सडकबाट नै आउँदै गरेको भिडियो खिच्दै गर्दा तस्कर दिपेश यादवले पत्रकार बिश्वकर्मामाथी दुर्व्यवहार र आक्रमण गरेका थिए ।

पत्रकार बिश्वकर्माको परिचय पत्र, क्यामेरा खोसेर आक्रमण गरेका यादवले धम्कि दिंदै प्रहरी सईकै अंगाडि पत्रकारले खिचेको भिडियो डिलिट गराएका थिए । यो घटनाले तस्करसंग प्रहरीको मिलोमतो रहेको कुरामा थप बल पुगेको छ ।

इलाका प्रहरी कार्यालय मझगावांका प्रहरी इन्स्पेक्टर सन्तोष बस्यालले पत्रकार माथी अभद्र व्यबहार गर्ने तस्कर दिपेश यादवलाई भगाएको आरोप लागेको छ ।