खोज

बुटवल, २७ चैत ।
घरेलु तथा साना उद्योग महासंघ रूपन्देहीको वार्षिक कार्ययोजना तथा संस्थागत क्षमता अभिवृद्धि सम्बन्धी २ दिने गोष्ठी सम्पन्न भएको छ । महासंघका कार्यसमितिहरुको व्यक्तित्व विकास, कार्यकुशलता अभिवृद्धिका सीपसंगै संस्थागत क्षमता अभिवृद्धि, रणनीतिक योजना निर्माण र त्यसको कार्यान्वयन गर्ने गरि पाल्पाको भैरवस्थानमा अभ्यास गोष्ठी सम्पन्न भएको महासंघका वरिष्ठ उपाध्यक्ष एवम् कार्यक्रम संयोजक देवानन्द पाण्डेले बताए । गोष्ठीका अवसरमा योगाभ्यास सहित मित्रमिलन, सहकार्य, संस्थागत सबलता लगायतका अभ्यास सञ्चालन गरिएको उनले बताए ।

कार्यक्रमको लुम्बिनी प्रदेशका नवनिर्वाचित अध्यक्ष गणेशप्रसाद अधिकारीले उद्घाटन गर्दै देशको सन्तुलित विकास, रोजगारी अभिवृद्धि, वित्त सञ्चालन, स्थानीय कच्चा पदार्थको सदुपयोग, आयात प्रतिस्थापनमा महासंघबाट खेलेको भुमिकाबारे चर्चा गरे ।

गोष्ठीका क्रममा महासंका पूर्व जिल्ला अध्यक्ष ध्रुवकुमार धितालले घरेलु तथा साना उद्योग महासंघको परिचय र नेपालमा उद्योगको वर्तमान अवस्थाका सम्बन्धमा कार्यपत्र प्रस्तुत गरेका थिए ।

उपप्राध्यापक एवम् प्रशिक्षक मुक्तिनाथ गैह्रेले व्यक्तित्व विकास, कार्यकुशलता अभिवृद्धिका सीप एवम् रणनीतिक योजना निर्माण र त्यसको कार्यान्वयनबारे सहजीकरण गरेका थिए भने दुर्गाबहादुर पोखरेलले योगाभ्यास गराएको महासचिव थानेश्वर चापागाईले बताए ।

कार्यक्रममा महासंघका केन्द्रिय उपाध्यक्ष नेत्रप्रसाद पाठक, केन्द्रिय सदस्य कन्हैयालाल कसौधन, बसन्त रोका क्षेत्री, प्रदेश कोषाध्यक्ष माया खनाल, संघका जिल्ला कार्यसमिति अध्यक्ष टंकनाथ अधिकारीले आफ्नो उद्योगका साथै समग्र महासंघको कुशल व्यवस्थापन र योजना कार्यान्वयनका लागि गोष्ठीले सीपसहित ऊर्जा थपेको बताए । कार्यक्रममा संघको लुम्बिनी प्रदेशका पदाधिकारी सहित रूपन्देही जिल्ला कार्यसमिति र पालिकास्तरमा क्रियाशील समितिका पदाधिकारीको प्रतिनिधिमूलक सहभागिता रहेको महासंघका जिल्ला सदस्य ऋषि भण्डारीले बताए ।
यसैबिच कार्यक्रममा महासंघ जिल्ला कार्यसमितिले प्रकाशन गरेको २०८२ सालको क्यालेण्डर समेत विमोचन गरिएको थियो ।