खोज

बुटवल, २५ चैत ।
नेपाल नगरपालिका कर्मचारी एशोसियसन ईकाइ समिति बुटवल उपमहानगरपालिकाको वार्षिक साधारणसभा तथा आठौं अधिवेशनबाट अध्यक्षमा अनिल कुमार माण्डव्य पुनः निर्वाचित भएका छन । आठौं अधिवेशनबाट सर्वसम्मतरूपमा उपाध्यक्षमा रेश्मीराज घिमिरे, सचिवमा त्रिदेव बुढाथोकी, कोषाध्यक्षमा रचना तुलाधर, सहसचिवमा राज कुमार श्रेष्ठ सर्वसम्मतरूपमा निर्वाचित भएका छन् । त्यस्तैगरी कार्यसमिति सदस्यहरूमा पुष्पराज ज्ञवाली, होमलाल भण्डारी, सिद्धार्थ आचार्य, गिता पाण्डे, धु्रव भट्टराई, सुजन पौडेल, पुजन ज्ञवाली, रामकुमार श्रेष्ठ, लोकनाथ चापागाईं, रस बहादुर विक, लक्ष्मण खराल, प्रशान्त भट्टराई निर्वाचित भएका छन् ।

त्यस्तैगरी कर्मचारी सामाजिक कल्याण कोषतर्फ सदस्यहरूमा देवराज श्रेष्ठ, सुरेन्द्र आचार्य र लक्ष्मी खनाल आचार्य चयन भएका छन् । अधिवेशनको बुटवल उपमहानगरपालिकाका नगर प्रमुख खेलराज पाण्डेयले उद्घाटन गरे । सोही अवसरमा बोल्दै उनले नगरको समग्र विकासका लागि कर्मचारी र जनप्रतिनिधिहरू सहकार्य गरीसँगै अघि बढ्नुपर्ने बताएका थिए ।
उनले केही कर्मचारीहरूले विकास निर्माण र नगरको हित विपरीत काम गरिहेको बताउँदै नगरपालिकामा रहेका करारका कर्मचारीहरूलाई निकाल्नका लागि केही कर्मचारी लागि रहेको बताए । सबै कर्मचारीहरू एक भएर यहाँ आउने सेवाग्राहीलाई सहज रूपमा सेवा प्रदान गर्न नगर प्रमुख पाण्डेयले कर्मचारी सबैलाई आग्रह गरे । कर्मचारीबिचको आपसी मनमुटावले नगरको काममा समस्या सिर्जना हुने बताउँदै उनले मनमुटाव त्यागेर अघि बढ्न सुझाव दिए ।

कार्यक्रममा उपप्रमुख सावित्रादेवी अर्यालले कर्मचारीहरूका आफ्ना हकहित प्राप्त गर्नका लागि संगठन आवश्यक पर्ने बताइन् । यहाँ रहेका सबै कर्मचारीहरूलाई गोलबद्ध गरी संगठनलाई थप बलियो बनाउनुपर्नेमा उनले जोड दिइन् । यस्तै कर्मचारी एशोसियसनका केन्द्रीय महासचिव सितुप्रसाद श्रेष्ठले कर्मचारीहरूका समस्या समाधानसँगै हकहितका लागि एशोसियसनले काम गरिरहेको बताए ।

कार्यक्रममा कर्मचारी एशोसियसन बुटवलका अध्यक्ष अनिल प्रसाद मान्डव्यले वार्षिक प्रदिवेदन प्रस्तुत गर्दै आफ्नो कार्याकालमा सम्पन्न भएका विभिन्न कार्यक्रमहरूबारे जानकारी गराए । साथै उनले कर्मचारीहरू एकआपसमा एकजुट हुन नसकेमा आफ्ना हकअधिकार प्राप्त गर्न नसकिने बताए । कर्मचारी एशोसियसन बुटवलका सचिव रेश्मीराज घिमिरेले एशोसियसनले कर्मचारीहरूलाई सुख दुःखमा साथ दिदै आएको बताउँदै ३७ जना कर्मचारीका परिवार र कर्मचारीहरूलाई २ लाख ७९ हजार बराबरको राहत रकम वितरण गरिएको बताए ।