खोज

सल्यान, २३ चैत । धार्मिक आस्था संगै पर्यटकीय सम्भावनाले भरिएको दक्षिण कालिका देवी मन्दिर कपुरकोट सल्यानमा पदमार्ग निर्माण भएको छ । कर्णाली प्रदेशको प्रवेशद्वारको रुपमा रहेको कपुरकोट स्थित यस मन्दिरमा चैते दशैको अवसर पारेर कलश यात्रा, देवी पुजा र कथा वाचन संगै नवनिर्मित सिढी९पदमार्ग० को औपचारिक उद्घाटन गरिएको हो ।

कर्णाली प्रदेशका उद्योग, पर्यटन, वन तथा वातावरण मन्त्री सुरेश अधिकारी कलश यात्रामा सहभागी भई मन्दिरसम्मको बाटो हिँडेर सिढी उद्घाटन गर्न पुगेका थिए । उनले ऐतिहासिक, धार्मिक, पर्यटकीय क्षेत्रको संरक्षण एवम बिकासमा आफुहरुले ध्यान दिइरहेको बताए ।

वडा तर्फको चार लाख पचास हजार, गाउँपालिकाको चार लाख रुपैया लगानी एवम स्थानियहरुको श्रमदानमा दक्षिण कालिका देवी मन्दिरसम्म पुग्नका लागि पक्की सिढी निर्माण गरिएको कपुरकोट,३ का वडा अध्यक्ष प्रदीप खड्काले जानकारी दिए । उनका अनुसार अब भक्तजन र पर्यटकहरू सजिलै सुरक्षित रुपमा मन्दिरसम्म पुग्न सक्छन् ।

उद्घाटन समारोहमा कलश यात्रा, देवी पूजा, कथा वाचन र मेला समेत आयोजना गरिएको थियो । मन्दिर व्यवस्थापन समितिका अध्यक्ष डम्बर बहादुर यरीले दक्षिण कालिका प्रतिको विश्वास पुस्तौंदेखि रहँदै आएको र आइतबार रामनवमीमा पनि ठूलो मेला लाग्ने जानकारी दिए ।

कार्यक्रममा गाउँपालिका अध्यक्ष दुर्गा बहादुर पुन, उपाध्यक्ष प्रकाश भण्डारी, वडा नम्बर ४ का अध्यक्ष मित्रलाल कठायतसहित स्थानीय जनप्रतिनिधिहरूको पनि उपस्थिति थियो ।