खोज

बुटवल, १६ चैत । शहिदलाई सम्मान गरौ, शहिदहरुले देखाएको बाटोमा अघि बढौ भन्ने नारासहित शहिद स्मृति खेलकुद क्लब र शहिद स्मृति प्रतिष्ठान नेपाल रुपन्देहीको आयोजनामा वनभोज तथा युवा मिलन कार्यक्रम गरिएको छ ।

तिलोत्तमास्थित बनबाटिकामा गरिएको कार्यक्रमको एक समारोहका बिच लुम्बिनी प्रदेश सभाका सभामुख तुलाराम घर्ति मगरले उद्घाटन गर्दै देशमा विकासको गति दिने आधारका रुपमा रहेका युवाहरु लक्षित युवामुखी कार्यक्रम प्रति सरकारको ध्यान जानुपर्ने बताए । तीन तहकै सरकारबाट युवामुखी कार्यक्रम र योजनाहरु बनाएर युवालाई सीप र रोजगार सकेमात्र देशमा आर्थिक विकासमा गति लिने भन्दै उनले समयको माग र चाहना अनुसार युवाहरुको मागलाई सम्बोधन हुन नसक्दा युवा पलायनको अवस्था आएको दुखेसो गरे ।

कार्यक्रममा पूर्वमन्त्री तथा नेकपा मोओबादी केन्द्रका सचिव चक्रपाणी खनाल बलदेवले देशमा हरेक राजनीति परिवर्तनमा युवाको योगदानको उचित मुल्याकन हुन नसकेको भन्दै युवाहरु राजनीतिमा आउनुपर्ने सुझाव दिए । तीन तहकै सरकारले युवामुखी कार्यक्रम र योजना प्रभावकारी रूपमा कार्यान्वयन गर्नेतर्फ लाग्नुपर्ने उनको धारणा छ ।

कार्यक्रममा शहिद स्मृति प्रतिष्ठान नेपाल रुपन्देहीका अध्यक्ष हरि घिमिरेले अहिले नेपालमा युवाहरू विदेशिने प्रवृत्ति बढ्नु बाध्यता भएको भन्दै यो तोड्ने गरि सरकारबाट स्थानीय स्तरमै रोजगारी सिर्जना गर्ने गरि लाग्नुपर्ने बताए ।

कार्यक्रममा क्लबका अध्यक्ष योगेन्द्र गौतमले युवाहरुलाई एकतावद्घ गरि खेलकुद, सामाजिक गतिविधिमा लाग्न अग्रसर गराउदै आएको बताए । समाजलाई युवामुखी बनाउने, परिवर्तनको बाहकका रुपमा रहेको युवा शक्तिलाई सहि ढंगबाट परिचालन गर्न जरुरी रहेको उनले बताए । युवाहरुमा भएका सीप, ज्ञानलाई साट्ने र बलियो देश बनाउन आफनो विज्ञतालाई सदुपयोग गर्न जरुरी रहेको उनले बताए ।

कार्यक्रममा क्लबको सचिव होम बिश्वकर्माले विगतबाट नै एउटा संस्कृतिका रुपमा मनाउदै आएको कार्यक्रमलाई निरन्तरता दिएको बताए ।