खोज

कपिलवस्तु, १५ चैत्र ।
कपिलवस्तु बहुमुखी क्याम्पसमा चैत्र ५ गते सम्पन्न स्वतन्त्र विद्यार्थी युनियन (स्ववियु) मा निर्वाचित पदाधिकारी र सदस्यलाई सपथ दिलाई प्रमाणपत्र हस्तान्तरण गरिएको छ । कपिलवस्तु बहुमुखी क्याम्पसमा आयोजित कार्यक्रममा स्ववियु अध्यक्ष निर्वाचित अध्यक्ष संदिप यादव सहितका प्रत्यक्ष तथा समानुपातिक तर्फ निर्वाचित पदाधिकारी र सदस्यलाई मुख्य निर्वाचन अधिकृत जिवनाथ मरासिनीले पद तथा गोपनियताको सपथ दिलाएका हुन ।क्याम्पस प्रमुख होतराज खनाल, पुर्व क्याम्पस प्रमुख नवराज तिवारी, सहायक क्याम्पस प्रमुख टिकाराम ज्ञवाली, मतदान अधिकृतहरू रजनिश पाण्डेय, गिरीराज पोख्रेल, रमेश घिमिरे, तारा ढकाल, प्रध्यापकहरू त्रिभुवन कुर्मी, नरेश खनाल लगायतले निर्वाचित पदाधिकारी तथा सदस्यलाई प्रमाणपत्र दिई कार्यकाल सफलताको शुभकामना दिए । स्ववियु निर्वाचितमा अध्यक्षमा यादव सँगै उपाध्यक्षमा समानुपातिक तर्फबाट नेहा त्रिपाठी, सचिवमा प्रत्यक्ष मारूफ खान, कोषाध्यक्षमा प्रत्यक्षमै आराधना पाण्डेय र सहसचिवमा समानुपातिक तर्फबाट विरेन्द्र यादव निर्वाचित भएका थिए ।

त्यसैगरि प्रत्यक्ष सदस्य तर्फ करन कुर्मी, पंकज कुमार पासवान, परशुराम यादव, कुमारी शुभम वर्मा, बजरंगी रैदास र समानुपातिक तर्फबाट शिला पाल, अंगेश्वरी शर्मा बढई, अफजल हुसेन तेली, दुर्गेश कुर्मी र मनिष कुमार पाण्डेय चयन भएका थिए । सपथ तथा प्रमाणपत्र हस्तान्तरणमा सरिक भएका स्ववियु अध्यक्ष संदिप यादवले आफूले पक्षपातरहित ढंगले क्याम्पस र विद्यार्थीको हक हितमा हरेक समय काम गर्ने प्रतिबद्धता जनाए । विद्यार्थीको हक हित संरक्षण गर्न सबै संगठनको लागी सहकार्य आवश्यक रहेकोले आवश्यक सहकार्यका लागि उनले आव्हान गरे । निर्वाचन सौहार्दपूर्ण रूपमा सफल भएकोमा खुसी व्यक्त गर्दै १५ गतेको क्याम्पस सभा सफल पार्न स्ववियु परिवारले पुर्ण सहयोग गर्ने क्याम्पस प्रमुख होतराज खनालको भनाई थियो । निर्वाचित पदाधिकारीले जिम्मेवारी बोध सहित नेतृत्व बिकासको अवसर सदुपयोग गर्न मुख्य निर्वाचन अधिकृत जिवनाथ मरासिनीले सुझाव दिए ।