दाङ, १४ चैत ।
पूर्व प्रधानमन्त्री तथा नेपाल समाजवादी पार्टी (नयाँ शक्ति) का अध्यक्ष डा। बाबुराम भट्टराईले नेपालको अर्थ राजनीति गम्भीर संकटमा रहेको टिप्पणी गरेका छन् । रिपोटर्स क्लब नेपाल दाङले आज घोराहीमा आयोजना गरेको कार्यक्रममा उनले ढिलो या छिटो सहमति जुटाएर प्रत्यक्ष निर्वाचित राष्ट्रपति प्रणाली कायम गर्न सकेमा हाल देखा परेको समस्या हल हुने बताए ।
संविधानले राजनीतिक अधिकार स्थापित गरेपनि अहिलेको शासकीय स्वरुपले अपेक्षा अनुसार काम गर्न नसक्दा प्रत्यक्ष निर्वाचित राष्ट्रपति अबको आवश्यकता रहेको बताए ।
उनले प्रत्यक्ष निर्वाचित कार्यकारी भएमा सरकार स्थिर रहने देशमा आर्थिक विकास संस्थागत हुने बताए ।
रोगको समयमा उपचार भएन भने अस्थिरता अझ बल्झिन्छ । अहिले भएको पनि यही हो । २०७२ को संविधानले राजनीतिक अधिकार दियो तर आर्थिक विकासका मुद्दा अघि बढाउन सकेन। त्यसैले जनतामा निराशा बढेको हो । युवा पलायन रोक्न, रोजगारी सिर्जना गर्न, कृषि उत्पादन बढाउन, आत्मनिर्भर राष्ट्र बनाउन सबै राजनीतिक दलहरु एक ठाउँमा उभिनु जरुरी छ, उनले भने । लामो राजनीतिक लडाइँपछि नेपालमा संविधान आयो। संविधान जारी भएपछि त्यो मैले भनेको थिएँ, यो संविधान आधा गिलास भरी र आधा जस्तै छ ।यसलाई पूर्णा दिन हामीले बाँकी काम गर्नुपर्छ । शासकीय स्वरुप पूर्णता दिन ध्यान दिनुपर्छ ।
राष्ट्रिय सहमति जुटाएर निर्वाचन प्रणाली सुधार गरेर अघि बढ्नु अहिलेको आवश्यकता रहेको बताउँदै उहाँले प्रत्यक्ष निर्वाचित राष्ट्रपति बनाउनुपर्ने, प्रत्यक्ष निर्वाचित प्रदेश मुख्यमन्त्री हुनुपर्ने, प्रत्यक्ष निर्वाचित संघीय र प्रदेश सांसद हुनुपर्ने तर्क गरे । यसैगरी, विषय विज्ञबाट मन्त्री चयन गरेर सरकार चलाउन सके सुशासन र गतिशीलता ल्याउन सकिने उनको दावी छ ।
नेपालमा राजनीतिक अधिकार स्थापित भएपनि आर्थिक समृद्धिको यात्रा बाँकी रहेकाले नयाँ विचारमा आधारीत नयाँ शक्ति अभियान चलाएको उनको भनाइ छ। यसका लागि नेपाल समाजवादी पार्टी नयाँ शक्तिले अभियान थालनी गरेको बताउँदै गणतन्त्रका पक्षधर एक ठाउँमा आउने बताए । त्यो बेला हामीले जे कुरा गरेका थियौं त्यो पूरा गर्न बाँकी छ। म आफु पनि अर्थ राजनीतिमा चासो राख्ने व्यक्ति हुँ। देशमा अस्थिरता रह्यो भने वाह्य हस्तक्षेप बढ्छ । ठूला शक्ति राष्ट्रले चासो राख्छन् । यो कुरा हामीले बुझ्न सक्नुपर्छ उनले भने राजनीतिमा नेपालको राजनीतिमा ठूला राष्ट्रको चासो हुन्छ । आन्तरिक समस्या यहीँ समाधान गर्न सक्नुपर्छ । वाह्य हस्तक्षेप रोक्न सरकारले ध्यान दिनुपर्छ ।
वर्तमान राष्ट्रिय राजनीति बारे बोल्दै अध्यक्ष भट्टराईले देशमा राजतन्त्र आउने कुनै आधार नरहेको तर्क गरे । उनले भाडाका व्यक्ति ल्याएर सडकमा उत्रिँदैमा लामो त्याग, तपस्या र बलिदानीबाट स्थापित संघीय लोकतान्त्रिक गणतन्त्र व्यवस्था नढल्ने बताए । उनको अहिलेको व्यवस्थामा समस्या भन्दा पनि व्यक्तिमा केही समस्या भएको हुँदा उनीहरु सच्चिनु पर्ने बताए ।
अहिले गणतन्त्र ढल्छ, राजतन्त्र आउँछ भनेर हल्ला फिजाईएको छ । यो अनावश्यक हल्ला खारेज गर्नुपर्छ । बगेको खोला उल्टो फर्केको कहीँ छ र ? मरिसकेको व्यवस्था कसरी उल्टिन्छर उनले भने —लोकतन्त्रको विकल्प उन्नत लोकतन्त्र हो । यसको प्रवर्द्धन गर्न सबै एक ठाउँमा उभिनु पर्छ । संघीय लोकतन्त्र, गणतन्त्र रक्षाका लागि जुटेर अघि बढ्नुपर्छ ।
यस्तै, नेपाल विद्युत प्राधिकरणको प्रमुुख कार्यकारी अधिकृतबाट सरकारले कुलमान घिसिङलाई हटाउनु उचित नभएको बताए ।
प्राधिकरणको प्रमुखमा नियुक्ति गर्ने प्रकृया
दलीय हस्तक्षेपमा रहेको हुँदा यही अहिले देखा परेको उनको टिप्पणी छ । उनले जे भएको छ बेठीक भएको छ। समस्याको निकास संस्थागत रुपमा निकाल्नु पर्छ भने । रिपोटर्स क्लब नेपाल दाङका अध्यक्ष शरद रेग्मीको अध्यक्षतामा भएको साक्षात्कार कार्यक्रमको सहजीकरण सन्तोष केसीले गरेका थिए
१७ चैत्र २०८१, आईतवार
