खोज

दाङ, १०चैत । स्वास्थ्य तथा जनसंख्या मन्त्री प्रदीप पौडेलले नागरिकलाई सहज र गुणस्तरीय सेवा प्रदान गर्न निर्देशन दिएका छन । जनताको पहिलो आवश्यकता स्वास्थ्य सेवा भएको भन्दै अस्पतालबाट नागरिकलाई गुणस्तरीय सेवा प्रदान गर्न ध्यान दिनुपर्ने उनले निर्देशन गरे । नेपाली कांग्रेस दाङले आइतवार घोराहीमा आयोजना गरेको भेटघाट कार्यक्रममा बोल्दै मन्त्री पौडेलले स्वास्थ्य बिमालाई प्रभावकारी बनाउँदै जनतालाई गुणस्तरीय सेवा दिनका लागि योगदानमा आधारित स्वास्थ्य बिमा प्रणालीको आवश्यकता रहेको बताएका हुन् ।

सरकारी अस्पतालको भौतिक सुधारसँगै उपकरण र जनशक्ति व्यवस्थापनलाई प्राथमिकता राखेको उनले बताए । उनले अस्पतालको फार्मेसीमा औषधी नराख्ने, सरकारी अस्पतालबाट दिने सेवा बिरामीलाई बाहिर रिफर गर्ने गरेको पाइएमा कडा कारवाही हुने बताएका थिए । बिरामीलाई अनाबश्यक दुख दिनेको पहिचान गरि कार्बाही गर्ने पनि बताए । सरकारले बिमाका लागि छुट्याउने रकमको दोव्वर तेब्बरले खर्च बढेको र अहिलेको अवस्थामा खर्चले धान्न सक्ने अबस्था नभएकाले सरकारले योगदानमा आधारित स्वास्थ्य बिमा प्रणालीलाई अघि सारेको बताए । बिमाको रकम भुक्तानी दावी गरिदा बेथिति रहेको गुनासो आउने गरेको भन्दै त्यसमा सुधारको आवश्यकता रहेको भन्दै मन्त्री पौडेलले भने,‘स्वास्थ्य बिमाका क्षेत्रमा केही विकृति भएको र उपचार नै नगरेर भुक्तानी माग्ने गरेको गुनासो आउने गरेको छ । सचेत नागरिकले त्यस्तो नगर्न आग्रह गरे ।

मन्त्री पौडेलले निजी क्षेत्रलगायतका सहयोगमा बिमा सेवालाई निरन्तरता दिन सक्ने अवस्था रहेको बताए । बिमामा सुर्ती र मदिराबाट उठ्ने करको ५० प्रतिशत रकम, सरकारी क्षेत्र र विभिन्न संघसस्थामा काम गर्नेहरुले दुई प्रतिशत बिमा बोर्डमा जग्मा गर्न सक्ने अवस्था भए अहिले बिमा क्षेत्रमा देखिएको समस्या हट्ने र सेवालाई प्रभावकारी बनाउन सकिने उनको भनाइ छ । सरकारले दिने सेवाभन्दा जनताले चाहेको विकास बढी भएको भन्दै मन्त्री पौडेलले जनताले परिवर्तनको महसुस खोजिरहेको बताए ।

प्रतिष्ठान घोराहीको फरेन्सिक भबन उद्धघाटन
स्वास्थ्यमन्त्री प्रदीप पौडेलले आजै राप्ती स्वास्थ्य बिज्ञान प्रतिष्ठान घोराही दाङको फरेन्सिक भबन, सामाजिक सुरक्षा कार्यक्रमदेखि बिद्युतिय मेडिकल रेकर्ड सिष्टमको उद्घाटन गरेका छन् । सो अवसरका उनले प्रतिष्ठानमा चार सय शैयाको अस्पताल निमार्ण योजना क्याबिनेट बैठकबाट स्वीकृति लिने बताएका छन् ।