खोज

काठमाडौँ ।

शान्ति प्रक्रियाको बाँकी कामबारे छलफल गर्न प्रमुख तीन दल नेपाली कांग्रेस, नेकपा एमाले र नेकपा माओवादी केन्द्रका शीर्ष नेताहरूबिच छलफलको तयारी भएको छ।

पुष्पकमल दाहाल प्रचण्डको सचिवालयले जनाए अनुसार, हुलाकी मार्ग केन्द्रीत तराई मधेस जागरण अभियानमा व्यस्त रहेका प्रचण्ड काठमाडौँ फर्केपछि टीआरसीको (सत्य निरूपण र मेलमिलाप आयोग) विषयमा शीर्ष नेताबिच छलफल हुनेछ। प्रचण्ड आइतबार साँझ काठमाडौँ फर्कनेछन्।

प्रचण्डका स्वकीय सचिव गोविन्द आचार्यले भने, “टीआरसी बाहेक अन्य कुनै विषयमा छलफल हुने छैन।” उनले थपे, “प्रधानमन्त्रीज्यूले संसदमा प्रमुख प्रतिपक्षी दलको नेतासँग सम्पर्क गर्न नसकेको बताएका छन्। हामी टीआरसीको विषयमा प्रधानमन्त्रीको सचिवालयसँग नियमित सम्पर्कमा छौँ।”

उनले स्पष्ट पारे कि, “प्रचण्ड अभियानको क्रममा जिल्लामा व्यस्त थिए, त्यसैले भेट हुन सकेन। उहाँ काठमाडौँ आएपछि टीआरसीको विषयमा छलफल हुनेछ, तर राष्ट्रिय सहमतिको सरकारको विषयमा छलफल हुने छैन। हामी २०८४ सम्म सरकारमा सहभागी हुने छैनौँ।”

आचार्यले ओलीका सल्लाहकार अग्नि खरेलसँग पनि टीआरसीको विषयमा छलफल भएको उल्लेख गरे। उनले वर्तमान सरकार गिराउने वा सरकारमा सहभागी हुने विषयमा कुनै सत्यता नभएको दाबी गरे।

यसअघि, चैत ६ गते प्रतिनिधि सभाको बैठकमा नेकपा माओवादी केन्द्रकी सांसद विमला सुवेदीले टीआरसीको विषयमा प्रश्न उठाउँदा प्रधानमन्त्री केपी ओलीले प्रचण्डसँग सम्पर्कको प्रयास भइरहेको जवाफ दिएका थिए। ओलीले बेपत्ता पारिएका व्यक्तिको छानबिन आयोग र सत्य निरूपण तथा मेलमिलाप आयोगका पदाधिकारी नियुक्ति प्रक्रिया चाँडो सुरु गरी शान्ति प्रक्रियाको बाँकी काम पूरा गर्न सरकार प्रतिबद्ध रहेको बताएका थिए।