खोज

सन्धिखर्क, १० चैत ।
अर्घाखाँची जिल्लामा एचपिभि खोप अभियान अन्तर्गत लक्ष्यको ९५ प्रतिशत किशोरीहरूले खोप लगाएका छन् । महिलाहरूको पाठेघरको मुखमा हुने क्यान्सरबाट बचाउने उद्देश्यले सञ्चालित ह्युमन प्यापीलोमा भाइरस (एचपिभि) खोप अभियान अन्तर्गत लक्ष्य नजिक प्रगति गर्दै सम्पन्न भएको स्वास्थ्य कार्यालय अर्घाखाँचीले जनाएको छ । गत माघ २३ देखि फागुन ६ गतेसम्म सञ्चालित अभियानबाट ७ हजार ५सय २६ किशोरीहरू लाभान्वित भएको स्वास्थ कार्यालयका प्रमुख शिव नेपालीले बताए ।प्रमुख नेपालीका अनुसार जिल्लाका ६ वटै स्थानीयतहमा अध्ययनरत कक्षा ६ देखि कक्षा १० सम्मका छात्रा तथा विद्यालयबाहिरका १० बर्षदेखि १४ वर्ष उमेर समुहका किशोरीहरूलाई स्थानीय तहमा रहेका केन्द्रहरूमार्फत खोप प्रदान गरिएको हो । किशोरी लक्षित अभियान अन्तर्गत ७ हजार ५सय २६ किशोरीहरूले खोप पाएका छन् । खोप अभियान जिल्लाका ६ स्थानीय तहहरू मध्येमा ३ नगर र ३ गाउँपालिकाका गरी १ सय ४० विद्यालय, ६१ स्वास्थ्य केन्द्र र बाह्य खोप केन्द्र गरी २ सय १केन्द्रमार्फत चलाइएको थियो ।

कार्यक्रम सुपरभाइजर कृष्ण प्रसाद पोख्रेलका अनुसार जिल्लाभरमा ७ हजार ९ सय २५ किशोरीलाई एचपिभी खोप लगाउने लक्ष्य राखिएकोमा ९५ प्रतिशत अर्थात ७ हजार ५सय २६ किशोरीहरूलाई खोप लगाउन सफल भएको हो । लक्ष्यको ५ प्रतिशत किशोरीहरूलाई अभियानमा समेट्न नसकिएको उनको भनाई छ । जस अनुसार ६ वटै स्थानीयतका ७ हजार ५सय २६ किशोरीहरू खोपबाट लाभान्वित भएका छन्। बाँकी रहेकाहरूलाई पनि कुनै न कुनै माध्यमबाट खोप दिलाउने योजना स्वास्थ्य कार्यालले लिएको छ । तहगत हिसावमा सबैभन्दा बढी सन्धिखर्क नगरपालिकामा १ हजार ८ सय ५, शितगंगा नगरपालिकामा १ हजार ४ सय ७५, मालारानी गाउँपालिकामा १ हजार २ सय ४२, भुमिकास्थान नगरपालिकामा १ हजार २ सय २४,पाण्निी गाउँपालिकामा ९ सय ७० र छत्रदेव गाउँपालिकामा ८ सय २१ किशोरीहरूले खोप लगाएका छन् । अभियानमा लक्ष्यको सबैभन्दा धेरै मालारानी गाउँपालिकाले९९ प्रतिशत र सवैभन्दा कम सन्धिखर्क नगरपालिकाले ८९ प्रतिशत किशोरीहरूलाई खोप लगाउन सफल बनेको छ ।

विश्व स्वास्थ्य सङ्गठनका अनुसार एचपिभी खोपले महिलाको बच्चादानीको मुखमा हुने क्यान्सरको जोखिम उल्लेख्य रूपमा रोक्न सक्ने पुष्टि भइसकेको छ। प्रजनन उमेर पुग्नु भन्दा अगावै यो खोप लगाउँदा बढी प्रभावकारी हुने भएकाले नेपाल सरकारले १० बर्षदेखि १४ बर्ष उमेर समूहका किशोरीलाई लक्षित गरी खोप अभियान संचालन गरेको हो ।
स्वास्थ कार्यालय अर्घाखाँचीमा कार्यलय प्रमुख शिव नेपाली आएसंगै चालु आर्थिक वर्ष २०८१/०८२ मा औषधीहरूको व्यवस्थापन गर्न अनलाईन ईएलएमआईएस कार्यक्रम, अनलाईन ईएचएमआईएस एबउभचभिकक कार्यक्रम,एक वडा एक स्वास्थ संस्था एक तालिम प्राप्त स्वास्थकर्मी, कुपोषीत बालवालिकाहरूको खोज कार्यक्रम,नसर्ने रोगहरूको पहिचान अभियान,स्थानिय तहमा स्वास्थ शाखाहरूको पारस्परिक भिजिट कार्यक्रम,स्वास्थ शिक्षा प्रर्वद्धन कार्यक्र,ट्राफिकसंग सडक दुर्घटना सम्बन्धी अन्तरक्रिया कार्यक्रम,खाद्य सुरक्षा कार्यक्रम, फेमिलि हेल्थ हिस्टोरी रेर्कड लिने,विद्यालयका किशोरकिशोरीहरूमा रक्तअल्पता परीक्षण कार्यक्रम,घरमा हुने सुत्केरी शुन्य बनाई पूर्ण संस्थागत सुत्केरी वडा तथा संस्था घोषणा अभियान, पूर्ण किशोरकिशोरी मैत्री स्वास्थ्य संस्था घोषणा अभियान लगायतका कार्यक्रमहरू संचालन गरिएको छ । आगामी दिनमा मोवाईल स्वास्थ कार्यक्रम संचालन गर्ने प्रमुख नेपालीले बताएका छन् ।