खोज

कपिलवस्तु, ०६ चैत ।

एनसेल फाउण्डेसनले जिल्लाको कपिलवस्तु नगरपालिका वडा नं. १० बिकुली स्थित श्री राष्ट्रिय माध्यमिक बिद्यालयमा २ सय ६० विद्यार्थीलाई झोला सहितको शैक्षिक सामाग्री बितरण गरेको छ । बिद्यालयमा आयोजित कार्यक्रममा श्री राष्ट्रिय माध्यमिक विद्यालयका २ सय र सोहि वडाको बिर्तामा रहेको मदरसा बहरूल उलुमका ६० गरि कक्षा १ देखी ५ सम्म अध्ययनरत २ सय ६० विद्यार्थीलाई झोला सहितको स्टेश्नरी सामाग्री बितरण गरिएको हो । एनपीएल खेलका क्रममा एनसेल फाउण्डेसनले प्रत्यक चौका बराबर ४ वटा झोला सहितको स्टेश्नरी सामाग्री विद्यालयमा बितरण गर्ने घोषणा अनुसार कार्यक्रममा सहभागी नेपाल क्रिकेट संघका सचिव पारस खड्का, एनसेल फाउण्डेसनका प्रमुख कार्यकारी अधिकृत जाब्बोर कायुमोभ, फाउण्डेसनकी निर्देशक बिशाखा लक्ष्मी खड्का, लुम्बिनी लायन्सका अध्यक्ष ईश्वर जिसी र फाउण्डेसनका एक्सपर्ट रमेश श्रेष्ठ सहितको टोलीले विद्यार्थीलाई सो सामाग्री हस्तान्तरण गरेको हो ।

वितरण गरिएको सामाग्रीमा झोला, कापी, कलम, पेन्सिल, कटर, स्केल लगायतका शैक्षिक सामाग्री छन । एनसेल फाउण्डेसनले बिद्यालयमा झोला सहितका शैक्षिक सामाग्री बाड्न थालेको सुचनाका आधारमा दिईएको अनलाईन आवेदनका क्रममा आफ्नो विद्यालयका विद्यार्थीलाई सो सामाग्री बाडिएकोमा खुसी लागेको श्री राष्ट्रिय माध्यमिक बिद्यालयका प्रधानाध्यापक रामहेतु चौधरीले बताए । “बिद्यालयमा गरिब र बिपन्न विद्यार्थी बढि छन । बिद्यालयमा अध्ययनरत बिद्यार्थीका लागी झोला सहितको शैक्षिक सामाग्री बितरण गर्ने कार्यले विद्यार्थीलाई खुसी बनाएको छ ।” प्रअ चौधरीले भने । देख्दा सानो सहयोग जस्तो देखिए पनि एनसेल फाउण्डेशनले बालबालिकालाई सामाजिक दायित्व पुरा गर्ने उद्धेश्यले झोला सहितको शैक्षिक सामाग्री दिएर खुसी छर्ने काम गरेको नेपाल क्रिकेट संघका सचिव पारस खड्काले बताए ।

एनपिएल खेलका क्रममा खेल अबधीभर लागेको ६ सय ५३ चौकालाई प्रति चौका ४ झोला गणना गरेर देशका सातै प्रदेशका विभिन्न विद्यालयमा २ हजार ६ सय १२ वटा झोला सहितको स्टेशनरी सामाग्री वितरण गर्ने योजना रहेको फाउण्डेसनका एक्सपर्ट रमेश श्रेष्ठले जानकारी दिए । एनपिएल लिगमा गरिएको घोषणा अनुसार लुम्बिनी प्रदेशमा दोस्रो पटक सामुदायिक विद्यालयका विद्यार्थीहरूलाई झोला सहितको शैक्षिक सामग्री बितरण गर्न थालेको फाउण्डेसनकी निर्देशक बिशाखा लक्ष्मी खड्काले बताईन । फाउण्डेशनले हाल सम्म देशभरका ६० बढि सामुदायिक बिद्यालयका ६ हजार बढि बिद्यार्थीलाई झोला सहितका शैक्षिक सामाग्री दिएको उनले जानकारी दिईन । झोला सहितको शैक्षिक सामाग्री हस्तान्तरण कार्यक्रममा मदरसा बहरूल उलुमका प्रधानाध्यापक रफि मोहम्मद फकिर, मदरसा व्यवस्थापन समितिका अध्यक्ष अब्दुल मोतिम खान, श्री राष्ट्रिय माध्यमिक बिद्यालयका सहायक प्रधानाध्यापक भोजराज पौडेल, बिद्यालय व्यवस्थापन समितिका अध्यक्ष रामबृक्ष यादव लगायत शिक्षक र बिद्यार्थीहरूको सहभागीता रहेको थियो ।