खोज

बुटवल, ०६ चैत ।
रूपन्देहीका तीन वटा क्याम्पसमा मात्र स्वतन्त्र विद्यार्थी युनियन (स्ववियु) को निर्वाचन भएको छ । त्रिभुवन विश्वविद्यालय अन्तर्गत मंगलबार देशभरका क्याम्पससँगै रूपन्देहीका पनि १२ वटा क्याम्पसमा स्ववियु निर्वाचनको तयारी गरिएको थियो। तर आठ वटा क्याम्पसमा विभिन्न विद्यार्थी संगठनहरूले तालाबन्दी गरेपछि निर्वाचन हुन सकेन ।कञ्चनस्थित हरैया बहुमुखी क्याम्पस, शुद्धोधनस्थित यज्ञोदय दुधनाथ थारू बहुमुखी क्याम्पस र सैनामैना रामपुरस्थित शहिद नारायण पोख्रेल बहुमुखी क्याम्पसमा मात्रै मंगलबार मतदान भएको हो ।यज्ञोदय दुधनाथ थारु बहुमुखी क्याम्पसमा  नेपाल विद्यार्थी संघका आदेश राना विजयी भएका छन् । देवदह आदर्श बहुमुखी क्याम्पस देवदहमा भने यसअघि नै स्ववियुको सिंगो कमिटी नै निर्बिरोध निर्वाचित भइसकेको छ । बाँकी आठ वटा क्याम्पसमा विद्यार्थी संगठनहरूको आपसी विवादका कारण स्ववियु निर्वाचन प्रक्रिया रोकिएको छ ।जिल्ला प्रहरी कार्यालय रूपन्देहीका अनुसार निर्वाचन हुन नसकेका आठ वटै क्याम्पसमा विद्यार्थी संगठनहरूले ताला लगाएका छन् ।

यस क्षेत्रकै सबभन्दा पुरानो र ठूलो बुटवल बहुमुखी क्याम्पस, लुम्बिनी वाणिज्य क्याम्पस, भैरहवा बहुमुखी क्याम्पस, पक्लिहवा कृषि क्याम्पस, सिद्धार्थ गौतमबुद्ध क्याम्पस, राममणि बहुमुखी क्याम्पस, लीलाराम बहुमुखी क्याम्पस र श्री सरस्वती संस्कृत विधापिठ क्याम्पसमा तालाबन्दी गरिएको छ ।तालाबन्दी गरिएका कतिपय क्याम्पसहरूमा विद्यार्थी संगठनहरूको असहमतिपछि निर्वाचन समिति नै विघटन गरिएको छ । भैरहवास्थित पक्लिहवा कृषि क्याम्पसमा निर्वाचन अधिकृतको राजीनामा माग्दै अनेरास्ववियु र अनेरास्ववियु (क्रान्तिकारी) ले तालाबन्दी गरेका छन् ।निर्वाचन अधिकृतले पूर्वाग्रही व्यवहार गर्दै षड्यन्त्रपूर्वक हस्तक्षेप गरेको आरोप लगाउँदै विद्यार्थी संगठनहरूले तालाबन्दी गरेपछि निर्वाचन प्रक्रिया स्थगित भएको हो । त्यस्तै, रूपन्देहीको भैरहवा बहुमुखी क्याम्पसमा पनि निर्वाचन प्रक्रिया अगाडि बढ्न सकेन । समाजवादी विद्यार्थी युनियन, समाजवादी विद्यार्थी युनियन नेपाल, जनमत विद्यार्थी संघ, राष्ट्रिय प्रजातान्त्रिक विद्यार्थी युनियन र स्वतन्त्र मधेस विद्यार्थी युनियनमा आबद्ध विद्यार्थीहरूले क्याम्पसमा तोडफोड गरेपछि निर्वाचन समितिले चुनाव प्रक्रिया अगाडि बढाउन सकेको थिएन ।

रूपन्देहीमा मात्र होइन लुम्बिनी प्रदेशका ५१ वटा क्याम्पसमा स्ववियु निर्वाचन हुन सकेन । लुम्बिनी प्रदेशमा त्रिभुवन विश्वविद्यालय अन्तर्गतका आंगिक तथा सम्बन्धन प्राप्त गरी १४६ वटा क्याम्पसमा निर्वाचन हुनुपर्ने थियो । तर, ९५ वटा क्याम्पसमा मात्र निर्वाचनका लागि सहमति जुटेको हो । विद्यार्थी संगठनहरूका बीचमा सहमति जुटेका ९५ वटा क्याम्पसमध्ये ३६ वटामा सर्वसम्मत रूपमा स्ववियू नेतृत्व चयन भइसकेको छ । जसमध्ये गुल्मी, बर्दिया र दाङका १५ वटा क्याम्पसमा नेपाली कांग्रेस निकट नेविसंघका उम्मेदवार सर्वसम्मत चयन भएका छन् । पाल्पा, गुल्मी, रूपन्देही, बर्दिया र दाङका १२ वटा क्याम्पसमा नेकपा एमाले निकट अनेरास्ववियुका उम्मेदवार सर्वसम्मत् रूपमा चयन भएका छन् भने दाङका ५ वटा क्याम्पसमा नेकपा माओवादी केन्द्रनिकट अखिल (क्रान्तिकारी) का उम्मेदवार सर्वसम्मत चयन भएका छन् । त्यस्तै, दाङस्थित राप्ती शिक्षा क्याम्पस र भिएन कलेज तथा प्यूठानको झिमरूक क्याम्पस बाग्दुलामा विप्लव नेतृत्वको अखिल (समाजवादी) तथा दाङको दीपशिखा कलेजमा राप्रपानिकट राष्ट्रिय प्रजातन्त्र विद्यार्थी संगठनले नेतृत्व पाएको छ । बाँकी ५९ वटा क्याम्पसमा मात्र मंगलबार निर्वाचन भएको हो ।