खोज

सुर्खेत, ५ चैत ।
यही चैत ७ गतेदेखि सञ्चालन हुने माध्यमिक शिक्षा परीक्षा (एसईई) मा कर्णाली प्रदेशमा एक सय ८० केन्द्रबाट परीक्षा सञ्चालन हुने भएको छ । प्रदेशको १० जिल्लामा उक्त संख्यामा परीक्षा केन्द्र निर्धारण गरिएको शिक्षा विकास निर्देशनालय सुर्खेतले जनाएको छ । सुर्खेतमा सबैभन्दा धेरै ३३ र डोल्पामा सबैभन्दा कम चारवटा परीक्षा केन्द्र रहने निर्देशनालयले जनाएको छ ।

परीक्षा सञ्चालन तथा व्यवस्थापनको लागि छ हजार एक सय ६५ जनशक्ति परिचालन हुने निर्देशनालयले जनाएको छ । प्रदेशभर एक सय ८० जना केन्द्राध्यक्ष र सहायक केन्द्राध्यक्ष दुई सय ५२, निरीक्षक एक हजार आठ सय ९५, परीक्षा सहायक तीन सय ८०, कार्यालय सहयोगी सात सय ५८ र सुरक्षाकर्मी दुई हजार सात सय जना परिचालन गरिने जनाइएको छ ।

त्यसैगरी यस वर्ष प्रदेशबाट एसईई परीक्षामा ३७ हजार नौ सय ११ परीक्षार्थी सहभागी हुने भएका छन् ।उक्त परीक्षामा साधारणतर्फ तीन हजार तीन सय ३८, प्राविधिकतर्फ एक सय छ, नियमिततर्फ तीन हजार चार सय ४४ र ग्रेड वृद्धितर्फ दुई सय २४ परीक्षार्थी परीक्षामा सहभागी हुने शिक्षा विकास निर्देशनालय कर्णाली प्रदेश सुर्खेतका सूचना अधिकारी लोकप्रसाद पौडेलले जानकारी दिए ।

कर्णाली प्रदेशका १० जिल्लामध्ये सबैभन्दा धेरै सुर्खेतमा नौ हजार हजार पाँच सय १३ र सबैभन्दा कम परीक्षार्थी डोल्पामा सात सय ७७ जनाले परीक्षा दिँदैछन् । यस्तै, दैलेखबाट छ हजार एक सय ९६, जाजरकोटबाट चार हजार छ सय ६८, सल्यानबाट चार हजार दुई सय ६९, कालिकोटबाट चार हजार ८९, रुकुम पश्चिमबाट तीन हजार छ सय ६८, जुम्लाबाट दुई हजार छ सय ८१, हुम्लाबाट एक हजार एक सय चार र मुगुबाट नौ सय सय ४६ परीक्षार्थी परीक्षा दिदै छन् ।