खोज

बुटवल, ३ चैत ।

रुपन्देही प्रहरीले गएको फागुन महिनामा १ सय १३ जना फरार प्रतिवादीहरुलाई पक्राउ गरेको छ । अदालतबाट विभिन्न मितिमा भएका फैसला कार्यान्वयनका क्रममा उनीहरुलाई पक्राउ गरिएको हो । प्रहरीकाअनुसार अदालतले दण्डजरिवाना तथा कैद सजाय तोकेपछि फरार रहेका उनीहरुलाई पक्राउ गर्दा १७ वर्ष २८ दिन कैद सजाय असुलउपर भएको छ ।

जिल्ला प्रहरी कार्यालय, रुपन्देहीले आइतबार नियमित मासिक पत्रकार सम्मेलन गरी एक महिनामा प्रहरीले सम्पादन गरेका कामको विवरण सार्वजनिक गरेको हो । प्रहरी प्रवक्ता डीएसपी सुरज कार्कीले फरार प्रतिवादी पक्राउ पर्दा २५ लाख ६६ हजार १५६ रुपैयाँ असुल समेत भएको जानकारी दिए । ‘१७ जना फरारलाई २० वर्ष पछि पक्राउ गरिएको छ’, उनले भने, ‘अपराध गर्ने अनि नेपाल–भारतका विभिन्न ठाउँमा लुगेर बस्ने गरेका उनीहरुलाई हामीले टिम नै खटाएर पक्राउ गर्ने गरेका छौं ।’

कार्कीले अपराध गरेपछि कुनै न कुनै दिन कानूनी दायरामा आउने जनाए । यस्तै, फागुनमा लागूऔषध ओसारपसार र कारोबारमा संलग्न १४ जनालाई पक्राउ गरेर मुद्दा चलाइएको उनले बताए । डीएसपी कार्कीका अनुसार अवैधरुपमा भारतबाट नेपाल भित्र्याइएको विभिन्न सामान समेत बरामद गरिएको छ । यसबाट १ करोड ८८ हजार ७८२ रुपैयाँ राजस्व संकलन भएको छ । चोरी तस्करीमा संलग्न ६ जना मानिसलाई समेत नियन्त्रणमा लिइएको छ ।

‘सीमा नाकामा निगरानी बढाइएको छ’, उनले भने, ‘अवैध कार्य गर्ने र गराउनेलाई प्रहरीले कानूनी दायरामा ल्याउँछ ।’ प्रहरीले विभिन्न हत्यामा संलग्न व्यक्तिलाई पक्राउदेखि ठाडो उजुरीमा परेका गुनासाहरु सम्बोधन गरिएको जनाएको । फागुनमा ११ हजार ६४० फोनकल मार्फत् प्रहरी सहायता मागिएकामा सबैजनालाई आवश्यक सहयोग गरिएको डीएसपी कार्कीले बताए ।

उनकाअनुसार पछिल्लो समय रुपन्देहीमा घरेलु हिंसा र आत्महत्याका घटना भने केही मात्रामा बढेका देखिन्छन् । घरेलु हिंसामा पर्नेमा अधिकांश २६ देखि ३५ वर्ष उमेर समूहका छन् । फागुनमा सबैभन्दा बढी १३ वटा बुटवल उपमहानगरमा घरेलु हिंसाका घटना घटेका छन् । यस्तै, फागुनमा २७ जनाले आत्महत्या गरेका छन् । आत्महत्या गर्नेहरुमा १९ देखि २५ वर्षसम्मका युवापुस्ता धेरै छन् ।

‘हामीले नियमित रुपमा हिंसा न्यूनीकरणका काम गरिरहेका छौं । आत्महत्या न्युनिकरणमा पनि काम भएका छन्’, उनले भने, ‘स्थानीय सरकारले प्रभावकारी रुपमा अभियान चलाए यस्ता घटना केही कम हुनेथिए ।’ प्रहरीले विभिन्न ठाउँमा नियमित ट्राफिक चेकिङ गरिएको, समुदाय–प्रहरी साझेदारी कार्यक्रम गरेको जनाएको छ ।