खोज

सल्यान, १ चैत ।

सल्यानमा आगलागीमा परेर एकजनाको मृत्यु भएको छ । जिल्लाको त्रिवेणी गाउँपालिका वडा नम्बर ३ तिमिलेचौरमा खरबारीमा लागेको आगो नियन्त्रण गर्ने क्रममा ६५ वर्षीय प्रेम बहादुर बस्नेतको मृत्यु भएको जिल्ला प्रहरी कार्यालय सल्यानले जनाएको छ ।

शुक्रबार दिउँसो करिब ३ बजे श्रीमान श्रीमती घाँस काट्न गएको बेला अचानक खरबारीमा आगलागी भएको थियो । आगो निभाउने क्रममा बस्नेत स्वयम आगलागीमा परेका थिए । उनको घटनास्थलमै उनको मृत्यु भएको जिल्ला प्रहरी कार्यालय सल्यानका सूचना अधिकारी तथा प्रहरी निरीक्षक बाबुराम बस्नेतले जानकारी दिए ।

आगलागी नियन्त्रणका लागि स्थानीयवासी र सुरक्षाकर्मीले सहयोग गरेका थिए । घटनाबारे त्रिवेणी गाउँपालिका–३ का वडा अध्यक्ष कर्ण देव डांगीले इलाका प्रहरी कार्यालय लुहामलाई जानकारी गराएका थिए । वडा अध्यक्ष डांगीका अनुसार बस्नेत दम्पती घाँस काट्न खरबारी गएका थिए । भिरालो स्थानमा रहेको खरबारीमा श्रीमान ओर्लन नसकेपछि श्रीमती गाउँलेलाई बोलाउन गएकी थिइन् । फर्कदा प्रेम बहादुर आगलागीबाट जलेको अवस्थामा मृत फेला परेका थिए ।

घटनापछि अनुसन्धानका लागि इलाका प्रहरी कार्यालय लुहामबाट प्रहरी निरीक्षक रतन शर्माको कमान्डमा पाँच जनाको टोली र जिल्ला प्रहरी कार्यालय सल्यानबाट प्रहरी नायब उपरीक्षक केशर कुमार न्यौपानेको नेतृत्वमा सात जनाको टोली खटेको छ । आगलागी कसरी सुरु भयो भन्ने विषयमा थप अनुसन्धान भइरहेको प्रहरीले जनाएको छ ।

कपुरकोटमा आगलागी, चार लाख बराबरको क्षति

यसैबिच सल्यानको कपुरकोट गाउँपालिका वडा नम्बर ६ रातामाटामा आगलागी हुँदा करिब चार लाख रुपैयाँ बराबरको क्षति भएको छ । शुक्रबार बिहान ८ः४५ बजे देविराम बोहराको दुईतले कच्ची घरमा विद्युत् सर्ट भएर आगलागी भएको थियो । स्थानीयवासी र प्रहरीले आगो पूर्ण रूपमा नियन्त्रणमा ल्याएका थिए ।

आगलागी बाट घरको पश्चिमतर्फका दुई कोठा पूर्ण रूपमा जलेर नष्ट भएका छन् । घर आंशिक रूपमा क्षति भए पनि मानविय तथा चौपायाको कुनै क्षति नभएको जिल्ला प्रहरी कार्यालय सल्यानले जनाएको छ । आगोले घरभित्र रहेका लत्ताकपडा, भाँडावर्तन, एक जोडी सुनको झुम्का र ५२ हजार नगदसहित करिब चार लाख रुपैयाँ बराबरको क्षति भएको छ । आगलागी भएको खबर प्राप्त हुनासाथ अस्थायी प्रहरी पोष्ट रिमबाट प्रहरी सहायक निरीक्षक हरी प्रसाद गौतमको कमान्डमा तीन जनाको टोली खटिएको थियो । प्रहरिले घटनाको अनुसन्धान र थप विवरण संकलन गरिरहेको छ ।