दाङ, २८ फागुन ।
दाङमा यो वर्ष ४७ वटा परीक्षा केन्द्रबाट १४ हजार दुई सय ५४ जना विद्यार्थीले एसइई दिँदैछन् । यो वर्ष सामुदायिक तथा निजी गरी २ सय ५४ वटा विद्यालयबाट १४ हजार दुई सय ५४ जना विद्यार्थीले एसइई दिन लागेका हुन् ।
परीक्षा दिनेमा छात्र भन्दा छात्राको संख्या धेरै छ । शिक्षा विकास तथा समन्वय एकाई दाङका अनुसार ६ हजार ७ सय ६६ छात्र र ७ हजार ४ सय ८८ जना छात्राले एसइई दिन लागेका प्रमुख देवमणि चाैधरीले जानकारी दिए । एकाई प्रमुख चाैधरीका अनुसार गतवर्ष जिल्लामा १२ हजार ८ सय ९८ जनाले एसइई दिएका थिए ।
जिल्लामा यो वर्ष एसइई दिनेमा छात्रभन्दा ७ सय २२ जना बढी छात्रा छन् । एसइई दिनेमा छ हजार ७ सय ६६ छात्र र ७ हजार ४ सय ८८ जना छात्राको संख्या रहेको शिक्षा विकास तथा समन्वय एकाइ दाङका प्रमुख चाैधरीले जानकारी दिएका छन् ।
उनले नियमिमतर्फ ५ हजार ५ सय ८१ छात्र र ५ हजार ९ सय ६५ छात्रा गरी ११ हजार ५ सय ४६ जना, प्राविधिक धारतर्फ छात्र १ सय ८२ र छात्रा १ सय ६८ जना गरी ३ सय ५० जना, गे्रटवृद्धि समूह साधारणतर्फ छात्र ९ सय ९३ र छात्रा १ हजार ३ सय ३७ गरी २ हजार ३ सय ३० जना तथा गे्रटवृद्धि प्राविधिकतर्फ छात्र १० जना र छात्रा १८ जना गरी २८ जना विद्यार्थीले एसइई दिन लागेका हुन् ।
जिल्लामा यस वर्ष ५ जना दृष्टिविहीन विद्यार्थीले पनि एसइई दिन थालेका छन् । जसमा तुलसीपुरमा रहेको श्रोत कक्षा गुरुजजुर माध्यमिक विद्यालयबाट ३ जना छात्र र १ जना छात्रा गरेर ४ जना र आदर्श माध्यमिक विद्यालय लालमटियाबाट १ जना छात्रले एसइई दिन थालेको शिक्षा विकास तथा समन्वय एकाइ कार्यालय दाङले जनाएको छ ।
जिल्लाका दश वटै स्थानीय तहमा विद्यार्थीलाई पायक पर्ने गरी यो पटक परिक्षा केन्द्र निर्धारण गरिएको शाखा अधिकृत तिलकराम बन्जाडेले बताए ।
चैत्र ७ गते बिहीबारदेखि १९ गते मंगलबारसम्म बिहान ८ बजेबाट ११ बजेसम्म परीक्षाको समय तालिका रहेको छ ।
पहिलो दिन अनिवार्य अंग्रेजी विषयको परीक्षा हुने छ । उक्त दिन संस्कृत वेदविद्याश्रमतर्फ अनिवार्य संस्कृत र मदरासातर्फ अनिवार्य अरेविक भाषाको परीक्षा हुनेछ ।
दोस्रो दिन चैत ८ गते अनिवार्य नेपाली विषयको परीक्षा हुने छ । उक्त दिन गैर नेपाली विद्यार्थीहरुका लागि अंग्रेजी (इलेक्टिभ इङ्गलिस)को परीक्षा हुनेछ ।
चैत १० गते अनिवार्य गणित र चैत १२ गते अनिवार्य विज्ञान विषयको परीक्षा हुने परीक्षा नियन्त्रण कार्यालयको तालिकामा उल्लेख छ । १९ गतेसम्म हुने परीक्षामा विद्यार्थीहरुले रोजेको विषय अनुसार परीक्षा हुने गरी तालिका सार्वजनिक गरिएको छ ।
परीक्षाको मिति नजिकिँदै गर्दा परीक्षा केन्द्रहरुमा उत्तरपुस्तिका पठाउनेदेखि आवश्यक तयारी तीव्र पारिएको समन्वय एकाईले जनाएको छ ।
परीक्षार्थीका लागि आवश्यक उत्तरपुस्तिका सबै परीक्षा केन्द्रमा पुगिसकेको छ भने अन्य परीक्षा सामग्रीहरु पनि सम्बन्धित निकायमा पुगिसकेको कार्यालयले जनाएको हो । यसैगरी, परीक्षा हुने विद्यालयका केन्द्राध्यक्ष लगायतलाई आवश्यक अभिमुखीकरणसमेत गरिएको बताईएको छ ।
१९ चैत्र २०८१, मंगलवार
