खोज

लमही ,२७ फागुन ।

लुम्बिनी प्रदेश सरकारले सञ्चालन गरेको ‘मेरो विद्यालय, मेरो दायित्व’ अभियान प्रभावकारी बन्दै गएको छ। पूर्व विद्यार्थीहरूलाई आफ्नै विद्यालयमा ज्ञान र सीप हस्तान्तरण गर्न तथा स्रोत अभिवृद्धिमा संलग्न गराउने उद्देश्यले थालिएको यो अभियानले सकारात्मक प्रभाव पार्दै आएको छ।सामाजिक विकास मन्त्रालयका अनुसार हालसम्म करिब एक करोड रुपैयाँ बराबरको स्रोत संकलन भइसकेको छ भने ७, हजा ५ सय भन्दा बढी पूर्व विद्यार्थीहरू अभियानमा संलग्न भएका छन्।

गत फागुन ९ गते, मुख्यमन्त्री चेतनारायण आचार्यले अभियानको शुभारम्भ गरेका हुन। सामाजिक विकास मन्त्रालयले प्रदेशभरिका विद्यालयमा अध्ययन गरेका पूर्व विद्यार्थीहरूको ज्ञान, सीप, र लगानीलाई प्रभावकारी रूपमा उपयोग गर्ने उद्देश्यले यो अभियान सञ्चालन गरेको हो। प्रारम्भमा १७ वटा विद्यालयबाट एकैसाथ अभियान सुरु गरिएको थियो।

मुख्यमन्त्री आचार्यका अनुसार सामुदायिक विद्यालयहरूप्रति अझै विश्वास र भरोसा बढाउनु आवश्यक भएकाले अभियान थालिएको हो। उनले भने, “अभियान सुरु भएपछि पूर्व विद्यार्थीहरू आफैंले कखरा चिनेको विद्यालयमा पुग्न थालेका छन्। यसले उनीहरूलाई आफ्नो विद्यालयप्रति मात्र जवाफदेही बनाएको छैन, शिक्षण सिकाइमा समेत योगदान गर्ने अवसर सिर्जना गरेको छ। यो अभियान शैक्षिक गुणस्तर अभिवृद्धिको महत्वपूर्ण माध्यम बन्नेछ।”

सामाजिक विकास मन्त्री जन्मजय तिमिल्सिनाका अनुसार अभियानले विद्यालयहरूको वार्षिकोत्सवमा फजुल खर्च गर्ने प्रवृत्ति रोक्न र शैक्षिक गुणस्तर सुधार गर्न मद्दत गर्नेछ। उनका अनुसार, “अभियानले पूर्व विद्यार्थीहरूलाई उत्साहित बनाएको छ। उनीहरू नियमित रूपमा विद्यालयमा पुगेर योगदान दिन थालेका छन्। विद्यालयका कार्यक्रमहरू रचनात्मक र प्रभावकारी हुनुपर्छ, जसमा विद्यालयहरूले विशेष ध्यान दिनुपर्छ।”

सामाजिक विकास मन्त्रालयका उपसचिव विष्णुप्रसाद पन्थीका अनुसार अभियान प्रभावकारी देखिएको छ। “पूर्व विद्यार्थीहरूलाई आकर्षित गर्ने काममा यो अभियान सफल भएको छ। हालसम्म करिब एक करोड रुपैयाँ बराबरको कोष स्थापना भइसकेको छ भने ७ हजार ५ सय भन्दा बढी पूर्व विद्यार्थीहरू परिचालित भएका छन्। प्रदेशका सामुदायिक विद्यालयमा पूर्व विद्यार्थीहरूको सक्रियता अभिवृद्धि गर्न हामी सफल भएका छौँ।”

लुम्बिनी प्रदेशका विद्यालयहरूको स्थिति

लुम्बिनी प्रदेशमा ६ हजार ३ सय ४० विद्यालय छन्, जसमध्ये ४ हजार ५ सय ३१ सामुदायिक विद्यालय छन्। यी विद्यालयहरूमा अध्ययनरत १२ लाख ,८८ हजार २९८ विद्यार्थीहरूमध्ये ९ लाख २५ हजार ६ सय २९ जना सामुदायिक विद्यालयमा अध्ययनरत छन्। अभियानले सामुदायिक विद्यालयको स्रोत अभिवृद्धि, शिक्षण सिकाइ सुधार, र पूर्व विद्यार्थीहरूको सक्रियता बढाउने लक्ष्य राखेको छ। यस अभियानलाई अझ प्रभावकारी बनाउन सरकार, विद्यालय प्रशासन, र पूर्व विद्यार्थीहरूबीच सहकार्य आवश्यक देखिन्छ।