© २०२३
बुटवल, १ भदौ ।
नेकपा एमाले लुम्बिनी प्रदेश संसदीय दलको बैठक आज शनिबार बुटवलमा बस्दैछ । प्रदेशका मुख्यमन्त्री एवं एमाले संसदीय दलका उपनेता चेतनारायण आचार्यले दलको बैठक बोलाएका हुन् । संसदीय दलका नेता लीला गिरीले राजीनामा दिएपछि पहिलो पटक बैठक बस्न लागेको हो ।
प्रदेशसभा सदस्यहरुका अनुसार आज शनिबार दिउँसो २ बजेका लागि बैठक बोलाइएको छ । बैठक मुख्यमन्त्री आचार्यको बुटवलस्थित सम्पर्क कार्यालयमा बस्नेछ । मुख्यमन्त्रीले विश्वासको मत लिने र दलको नेता परिवर्तनको विषयमा छलफलको एजेन्डा रहेको नेताहरु बताएका छन् ।
मुख्यमन्त्री आचार्यले मंगलबार विश्वासको मत लिने तयारी गरेका छन् । विश्वासको मत प्रयोजनका लागि प्रदेशसभाको बैठक आहृवान भएको छ । विश्वासको मतअघि नै दलको नेताको टुंगो लगाएर दलको तर्फबाट विश्वासको मतका लागि हृवीप जारी गर्नु पर्ने भएकाले बैठक आहृवान भएको र सम्भवतः शनिबारको बैठकबाट दल नेता परिवर्तन हुन सक्ने रूपन्देहीकै एक प्रदेशसभा सदस्यले बताए ।
शनिबारको बैठक दलका उपनेता आचार्यकै अध्यक्षतामा बस्नेछ । बैठकमा पार्टी लुम्बिनी प्रदेश इन्चार्ज पद्मा अर्याल पनि उपस्थित हुने नेताहरुले जनाएका छन् ।
लुम्बिनी प्रदेशसभाका प्रमुख सचेतक तुलसीप्रसाद चौधरीले भने शनिबारको दलको बैठकमा मुख्यमन्त्रीले भदौ ४ गते मंगलबार लिने विश्वासको मत मात्र एजेन्डा रहेको बताए । उनका अनुसार दल नेताले यसअघि दिएको राजीनामाको विषयमा शनिबार छलफल हुने र त्यसपछि सम्भवतः दल नेता लीला गिरीकै अध्यक्षतामा बैठक संचालन हुने उनले बताए ।
एमाले संसदीय दलका नेता लिला गिरीले संसदीय दलको नेताबाट आफूले राजीनामा दिइसकेकाले यही एजेण्डा मुख्य हुन सक्ने बताए । “मैले राजीनामा दिइसकेको हुनाले दलको नेता चयन नै मुख्य एजेण्डा होला”–उनले भने ।
लुम्बिनीमा एमालेका २९ र कांग्रेसका २७ गरी ५६ जनाको समर्थनमा आचार्य साउन ७ गते मुख्यमन्त्री नियुक्त भएका थिए । गिरी दल नेता रहेकै अवस्थामा केन्द्रीय नेतृत्वबाट आचार्यलाई मुख्यमन्त्रीमा अघि सारिएपछि गिरीले दल नेताबाट राजीनामा दिएका थिए । कांग्रेसभित्र मन्त्री छनोटको किचलो र एमालेभित्र दल नेताको विवादले मुख्यमन्त्रीले विश्वासको मत लिन सकेका छैनन् । सरकारलाई पूर्णता दिएर मात्र विश्वासको मत लिने तयारी गरेका मुख्यमन्त्री आचार्यले कांग्रेस भित्रको विवाद तत्काल समाधान हुने नदेखेपछि मंगलबार विश्वासको मत लिने तयारी गरेका हुन् ।
अहिले मुख्यमन्त्रीसहित लुम्बिनीमा एमालेका ५ र कांग्रेसका ४ मन्त्री छन् । कांग्रेसले थप एक मन्त्री सिफारिस गर्न बाँकी छ । १२ मन्त्रालय रहेको लुम्बिनीमा २ मन्त्रालय साना दलका लागि राखिएको छ । तर, सरकारलाई समर्थन गरेका लोसपा, जसपा र नागरिक उन्मुक्ति तीनवटै दलले मन्त्रालयमा दाबी गरेको र दुई दललाई मात्र भाग पुग्ने भएकाले एमाले–कांग्रेस अप्ठ्यारोमा छन् । स्रोतका अनुसार लोसपा र जसपालाई १÷१ मन्त्रालय दिएर नागरिक उन्मुक्तिलाई राज्यमन्त्री वा अन्य नियुक्तिमा मिलाउने प्रयास दुई ठूला दलले गरेका छन् ।
लुम्बिनीमा सरकारलाई समर्थन गर्ने दलबाट नागरिक उन्मुक्ति पार्टीका ४, जनमत ३, लोसपा ३, जसपा २, जसपा नेपाल १ जना प्रदेशसभा सदस्य छन् । त्यस्तै प्रतिपक्षमा रहेका माओवादीका १०, राप्रपाका ४, नेकपा एकीकृत समाजवादी, जनमोर्चा र स्वतन्त्र १÷१ प्रदेशसभा सदस्य छन् । लुम्बिनी प्रदेशसभा ८७ सदस्यीय रहेको छ ।