खोज

बुटवल, ७ साउन ।

एमाले लुम्बिनीमा गुटगत राजनीतिको प्रभाव देखिएको छ । एमालेले लुम्बिनी प्रदेशको मुख्यमन्त्रीमा चेतनारायण आचार्यलाई अघि सारेसँगै गुटगत राजनीतिको प्रभाव देखिएको हो । यसअघि एमाले संसदीय दलका नेता लीला गिरी मुख्यमन्त्री बन्ने पक्कापक्कीजस्तै भए पनि एमाले केन्द्रको निर्देशनमा आचार्यलाई अघि बढाइएको हो ।

उनी यसअघि आर्थिक मामिलामन्त्री रहेका थिए । आचार्यलाई पार्टीले निर्णय गरेर मुख्यमन्त्री बनाउन लागेको हो । स्रोतका अनुसार आचार्यलाई मुख्यमन्त्री बनाउन पार्टी केन्द्रबाटै निर्देशन आएको हो । “महासचिवको निर्देशन आएपछि मुख्यमन्त्रीमा आचार्यलाई अघि सार्ने निश्चित भएको हो”–एमालेका एक केन्द्रीय सदस्यले भने ।

एमाले प्रदेश संसदीय दलका प्रमुख सचेतक तुलसीप्रसाद चौधरीले आचार्य मुख्यमन्त्री बन्ने पुष्टि गरे । उनले भने, ‘पार्टीले आचार्यलाई मुख्यमन्त्रीमा अघि सारेको छ, अब आचार्य नै मुख्यमन्त्री बन्नुहुन्छ ।’

अब बन्ने मुख्यमन्त्री आचार्यले दलको नेता लीला गिरी भए पनि मुख्यमन्त्रीमा आफूले दाबी पेश गर्न लागेको बताए । कांग्रेस नेता डिल्ली चौधरी आएपछि प्रदेश प्रमुखकहाँ जाने उनले सुनाए ।

संसदीय दलका नेता लीला गिरी पार्टी उपाध्यक्ष तथा संघीय अर्थमन्त्री विष्णु पौडेल निकट मानिन्छन् । पौडेल निकट गिरीलाई अचानक पछाडि पार्दै आचार्य मुख्यमन्त्री बन्नुका पछाडि केन्द्रको चासो र निर्देशनले काम गरेको निकटस्थ नेताहरुले बताए ।

कांग्रेस एमाले गठबन्धनकै समझदारी लागू हुने भएकाले आचार्यलाई स्वतः बहुमत मिल्ने छ । अर्घाखाँचीको निर्वाचन क्षेत्र नम्बर १ को १ बाट निर्वाचित आचार्य एमालेका केन्द्रीय सदस्य छन् ।