खोज

लमही २२ असार ।

दाङमा गएरातिदेखि परेको भिषण बर्षापछि आएको बाढी बस्तीमा पस्न थालेको छ । लगातार परिरहेको भिषण बर्षाका कारण दाङको देउखुरीका बस्ती डुबानमा पर्न थालेका हुन् ।

राप्ती गाउँपालिका–५ लठ्ठहवा, पहरूवा र कालापानी र लमही नगरपालिका वडा नम्बर ८ धनपुरूवा गाउँमा राप्ती नदीको बाढी पसेको छ । गतवर्ष जस्तैः धनपुरूवा गाउँ डुबानमा परेको छ । लमही नगरपालिका, सशस्त्र प्रहरी बल नेपाल, नेपाल प्रहरी र नेपाली सेनाको टोली धनपुरूवा गाउँमा उद्दारको लागि परिचालन हुन लागेको लमही नगरपालिका विपद् शाखा प्रमुख गायत्री थापाले जानकारी दिइन् । बाढीका कारण उच्च जोखिममा परेका घरका नागरिकलाई सुरक्षित स्थानमा सार्ने काम सुरु भएको छ । सुरक्षा निकायहरुले उच्च जोखिममा परेका बस्तीका नागरिकलाई सुरक्षित स्थानमा सार्न थालेका हुन् ।

लगातार पानी परिरहेकाले स्थानीय खहरे खोलामा जलसतह बढेको छ । यस्तै, इलाका प्रहरी कार्यालय, सिसहनियाँको भवन पनि डुबानमा परेको छ । कार्यालयको सामग्रीहरू सुरक्षित स्थानमा सारिएको छ ।

यस्तै, राप्ती नदीमा जलसतह बढ्दै गएको छ । नदी तटीय क्षेत्रमा डुबान र कटानको जोखिम उच्च रहेकाले सतर्क रहन अपिल गरिएको छ । बर्षाका कारण केही सडक अबरुद्ध बनेका छन् ।

घोराही तुलसीपुर सडक अवरुद्ध

अविरल वर्षाका कारण आएको बाढीले सेवार खोलाको डाईभर्सन बगाएको छ । डाईभर्सन बगाए संगै घोराही तुलसीपुर सडक अवरुद्ध भएको छ ।

अविरल रुपमा पानी परेको र खोलामा पानीको बहाब बढिरहेका कारण तत्काल मर्मत गर्न नसकिने जिल्ला प्रशानक कार्यलय दाङले जनाएको छ । डाईभर्सन नबन्दासम्म वैकल्पिक बाटोको प्रयोग गर्न जिल्ला प्रशासन कार्यालय दाङले अनुरोध गरेको छ ।